Մարցում մետաղական հանք շահագործելու վերաբերյալ հանրային լսումը տապալվեց

Ինչպես արդեն տեղեկացրել էինք, ‹‹ԷՄ ՋԻ ՓԻ ՌԵՍՈՒՐՍԻԶ›› ՍՊԸ-ն այսօր հանրային քննարկում էր նախաձեռնել ՀՀ Լոռու մարզի Մարցի գետի հանքային դաշտի Մարցի ոսկի-բազմամետաղային հանքերևակման տարածքում (օգտակար հանածոյի արդյունահանման նպատակով) երկրաբանական ուսումնասիրություններ իրականացնելու վերաբերյալ:

Տեղի բնակիչների և նրանց միացած ակտիվիստների ջանքերով լսումը տապալվեց: Հանդիպման սկզբում ելույթ ունեցավ Հրանտ Մաթևոսյանի որդին՝ Դավիթ Մաթևոսյանը, ով ներկայացրեց բնակիչների միաձայն որոշումը. գյուղում հանք չեն ուզում, և, որպես բոյկոտ, ներկաները լքեցին դահլիճը՝ հյուրերին նույնիսկ խոսելու հնարավորություն չտալով: 

Ընկերության ներկայացուցիչներն իրենց հետագա ծրագրերի մասին չցանկացան որևէ մեկնաբանություն տալ: Առաջին լսումը տապալվելուց հետո կազմակերպությունը կա՛մ կարող է ընդհանրապես ետ կանգնել համայնքում հանք շահագործելու մտքից, կա՛մ փորձել գումարել երկրորդ լսումը: