ՆԱՏՕ-ի ռազմածովային ուժերի ղեկավարը բացահայտել է դաշինքի ծրագրերը Սև ծովում

ՆԱՏՕ-ի ռազմածովային ուժերի հրամանատար, բրիտանացի փոխծովակալ Քիթ Բլաունթը հայտարարել է, որ Հյուսիսատլանտյան դաշինքը չի նախատեսում երկար ժամանակ բացակայել Սև ծովից։ Նա համապատասխան հայտարարություն է արել Վառնայում Բուլղարիայի ռազմածովային ուժերի ղեկավար Կիրիլ Միխայլովի հետ հանդիպումից հետո, հաղորդում է Բուլղարիայի ազգային հեռուստատեսությունը։

Բլաունթի խոսքով՝ ՆԱՏՕ-ն ամեն օր վերանայում է սեփական պլանները՝ կախված իրավիճակից։ Նա նաև նշել է, որ դաշինքն ունի նավեր, սուզանավեր և ինքնաթիռներ, որոնց «գործողության ծրագիրը ամեն օր հարմարեցվում է»։

«Ես ուզում եմ… կրկին ընդգծել, որ ՆԱՏՕ-ն մտադիր չէ երկար ժամանակ մնալ Սև ծովից դուրս», - ասել է Բլաունթը:

Ապրիլի վերջին Թուրքիայի ազգային պաշտպանության նախարար Հուլուսի Աքարը հայտարարել էր, որ Սև ծովում տարածաշրջանից դուրս գտնվող երկրների ռազմանավեր չկան։ Նա նշել էր, որ ՆԱՏՕ-ի նավերի տեղաշարժը ջրերում կարող է մեծացնել լարվածությունը սեւծովյան տարածաշրջանում։

Աքարը նաև ընդգծել էր, որ Անկարան թույլ չի տա ռազմանավերի մուտքը Սև ծով։