ԱՄՆ-ն և ԵՄ-ն մտադիր են մինչև վերջին ուկրաինացին կռվել Ռուսաստանի դեմ. Լավրով

ՆԱՏՕ-ի երկրներն ամեն ինչ անում են՝ թույլ չտալու քաղաքական պայմանավորվածությունների միջոցով Ուկրաինայում ռուսական հատուկ գործողության ավարտը։ Այս մասին «Սինհուա» լրատվական գործակալությանը տված հարցազրույցում ասել է ՌԴ ԱԳ նախարար Սերգեյ Լավրովը։

«Այժմ մենք ականատես ենք արևմտյան իսթեբլիշմենթի դասական երկակի ստանդարտների և կեղծավորության դրսևորմանը: Հանրային աջակցություն հայտնելով Կիևի ռեժիմին, ՆԱՏՕ-ի երկրներն անում են ամեն ինչ, որպեսզի թույլ չտան գործողության ավարտը՝ քաղաքական պայմանավորվածություններ ձեռք բերելով»,- ասել է նախարարը։

«Լեհաստանով և ՆԱՏՕ-ի այլ երկրներով անվերջ հոսքով տարատեսակ զենքեր են ուղարկվում Ուկրաինա: Այս ամենն արվում է «ներխուժման դեմ պայքարի» պատրվակով, բայց իրականում ԱՄՆ-ն և Եվրամիությունը մտադիր են մինչև վերջին ուկրաինացին կռվել Ռուսաստանի դեմ, և նրանք բացարձակապես անտարբեր են Ուկրաինայի՝ որպես միջազգային հարաբերությունների անկախ սուբյեկտի ճակատագրի նկատմամբ»,- հավելել է Լավրովը։

ՌԴ ԱԳՆ ղեկավարն ընդգծել է, որ ԱՄՆ-ն և ՆԱՏՕ-ն «պետք է ուշքի գան և դադարեցնեն զենք ու զինամթերք մատակարարել Կիևին», եթե իսկապես շահագրգռված են ուկրաինական ճգնաժամի կարգավորմամբ։