Մեր հաշվարկներով՝ ՌԴ-ն Ուկրաինայում ունի ավելի քան 10 000 զոհ. Պետդեպ
ՄԻՋԱԶԳԱՅԻՆ
ԱՄՆ-ն կարծում է, որ Ուկրաինայում հատուկ ռազմական գործողության շրջանակում ռուսական կողմի կորուստները գերազանցում են տասը հազարը։ Այս մասին currenttime.tv-ին տված հարցազրույցում ասել է ԱՄՆ պետքարտուղարի տեղակալ Վիկտորյա Նուլանդը։
«Ցավոք, Ռուսաստանը դեռ լիովին չի հասկացել, թե որքան ուժեղ է ուկրաինական բանակը։ Ռուսական կողմը անհավատալի կորուստներ է կրում։ Մեր հաշվարկներով՝ ավելի քան 10 000 ռուս է սպանվել», - ասել է Նուլանդը։
Մինչդեռ Ուկրաինայի զինված ուժերի գլխավոր շտաբը հակառակորդի կորուստները գնահատել է 17 500 մարդ։ Սակայն ՌԴ ՊՆ տվյալներով՝ ռազմական գործողության շրջանակում ռուսական կողմի մարդկային կորուստները չեն գերազանցում 1400-ը:
Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին:
Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»:
Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։
Ի պատասխան Արևմուտքը սահմանել է նոր հակառուսական պատժամիջոցներ: Մասնավորապես, դրա ներքո են հայտնվել մի քանի խոշորագույն բանկեր, ներառյալ «Սբերբանկ»-ը և ՎՏԲ-ն: Եվրամիությունը, ԱՄՆ-ն, Կանադան և մի շարք այլ երկրներ երկինքը փակել են Ռուսաստանի ինքնաթիռների համար: Մի շարք պետական ընկերությունների համար դժվարացել են օտարերկրյա կապիտալի ներգրավման հնարավորությունները: Պատժամիջոցներ են սահմանվել բարձրտեխնոլոգիական ապրանքներ Ռուսաստան մատակարարելու վրա:
