Ես հասկանում եմ Զելենսկու հիասթափությունը, սակայն հակամարտությունը չպետք է դուրս գա Ուկրաինայի սահմաններից. Ստոլտենբերգ
ՄԻՋԱԶԳԱՅԻՆ
ՆԱՏՕ-ի գլխավոր քարտուղար Ենս Ստոլտենբերգն ասել է, որ հասկանում է Ուկրաինայի նախագահ Վլադիմիր Զելենսկու և ուկրաինացի ժողովրդի հիասթափությունը, սակայն նշել է, որ դաշինքի համար կարևոր է խուսափել իրավիճակի էսկալացիայից, գրում է korrespondent.net-ը:
Ստոլտենբերգը հավաստիացրել է, որ դաշինքն աջակցում է Ուկրաինային և միևնույն ժամանակ զգուշացում արել հակամարտության ընդլայնման դեմ։
«Մենք մեծացրել ենք մեր ռազմական և ֆինանսական աջակցությունը. Գերմանիան առանցքային դեր է խաղում այդ ջանքերում»,- ասել է նա։
Նաև «աննախադեպ պատժամիջոցների» պատճառով Ռուսաստանը, նրա խոսքով, պետք է «բարձր գին» վճարի պատերազմի համար։
«Ես հասկանում եմ նախագահ Զելենսկու և ուկրաինացի ժողովրդի հիասթափությունը, քանի որ նրանք դարձել են նախագահ Պուտինի զավթիչ զորքերի հետ դաժան, անիմաստ պատերազմի զոհերը», - հավելել է Ստոլտենբերգը։
Միաժամանակ, ըստ նրա, անհրաժեշտ է ապահովել, որ այս հակամարտությունը դուրս չգա վերահսկողությունից և չանցնի Ուկրաինայի սահմաններից դուրս:
Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին:
Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»:
Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։
Ի պատասխան Արևմուտքը սահմանել է նոր հակառուսական պատժամիջոցներ: Մասնավորապես, դրա ներքո են հայտնվել մի քանի խոշորագույն բանկեր, ներառյալ «Սբերբանկ»-ը և ՎՏԲ-ն: Եվրամիությունը, ԱՄՆ-ն, Կանադան և մի շարք այլ երկրներ երկինքը փակել են Ռուսաստանի ինքնաթիռների համար: Մի շարք պետական ընկերությունների համար դժվարացել են օտարերկրյա կապիտալի ներգրավման հնարավորությունները: Պատժամիջոցներ են սահմանվել բարձրտեխնոլոգիական ապրանքներ Ռուսաստան մատակարարելու վրա:
