Կրեմլը՝ ՌԴ և Ուկրաինայի նախագահների հանդիպման հնարավորության մասին

ՌԴ եւ Ուկրաինայի նախագահներ Վլադիմիր Պուտինի եւ Վլադիմիր Զելենսկու հանդիպման հնարավորությունը՝ կարգավորման պայմանագրի ստորագրման համար, կախված կլինի փաստաթղթի մոդալությունից, այն դեռ պետք է համաձայնեցվի։ Այս մասին լրագրողներին ասել է Ռուսաստանի նախագահի մամուլի քարտուղար Դմիտրի Պեսկովը, տեղեկացրել է ՏԱՍՍ-ը։

«Դա կախված կլինի այն փաստաթղթի մոդալությունից, որը դեռ պետք է համաձայնեցնել»,- ասել է Կրեմլի ներկայացուցիչն ի պատասխան այն հարցի, թե արդյոք իսկապես նախատեսվում է այդպիսի անձնական շփում, թե փաստաթուղթը կարող է ստորագրվել անմիջականորեն նախագահների ներկայությամբ։

«Կարող եմ միայն փաստել, որ ռուսական պատվիրակությունն անհամեմատ ավելի արագ աշխատելու պատրաստակամություն է ցուցաբերում, քան դա արվում է այժմ։ Ցավոք, ուկրաինական պատվիրակությունը բանակցությունների տեմպի արագացման պատրաստակամություն չի ցուցաբերում»,- նշել է նա։

Ավելի վաղ Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը հայտարարել էր, որ Պուտինի եւ Զելենսկու հանդիպումը կարող է տեղի ունենալ համաձայնագրի պատրաստման աշխատանքն ավարտելուց հետո։ Քաղաքական գործչի գնահատմամբ՝ դա հնարավոր է առաջիկա շաբաթների ընթացքում։