Իրանի ԱԳՆ-ն հերքել է միջուկային գործարքի շուրջ համաձայնության հասնելու մասին արեւմտյան ԶԼՄ-ների տեղեկությունները

Իրանի ԱԳՆ պաշտոնական ներկայացուցիչ Սաիդ Խաթիբզադեն հերքել է Վիեննայում միջուկային գործարքի շուրջ բանակցություններում համաձայնության հասնելու մասին արեւմտյան ԶԼՄ-ների տեղեկությունները, հաղորդում է Mehr-ը։    

Reuters-ը հայտնել է, որ ստացել է Վիեննայի բանակցությունների մասնակիցների կողմից համաձայնեցված 20 էջանոց համաձայնագրի նախագիծը, որում նշվում է քայլերի հաջորդականությունը, որոնք պետք է իրականացվեն գործարքի մյուս մասնակիցների կողմից հաստատվելուց հետո:

Իրանական Nour News կայքը, որը մոտ է Ազգային անվտանգության բարձրագույն խորհրդին (SNSC), հայտարարություն է տարածել՝ հերքելով Reuters-ի հրապարակումը, նշելով, որ այն նպատակ ունի միայն կեղծ պատկերացում կազմել Վիեննայում բանակցությունների մասին, բարձրացնել արեւմտյան կողմերի հեղինակությունը եւ ցույց տալ, որ նրանք լուրջ զիջումների են հասել իրանական կողմից։ 

«Իրանն ի սկզբանե հայտարարել է, որ քանի դեռ Միացյալ Նահանգները չի ձեռնարկել պատժամիջոցները չեղարկելու համար անհրաժեշտ քայլերը, Իսլամական Հանրապետությունը ոչինչ չի անի իր միջուկային գործունեությունը նվազեցնելու համար, ինչը համահունչ է ԳՀՀԾ-ով ստանձնած պարտավորություններին»,- ասվում է զեկույցում։ 

Վիեննայի բանակցություններում Ռուսաստանի գլխավոր ներկայացուցիչ Միխայիլ Ուլյանովը նույնպես թվիթերյան իր էջում գրել է, որ «միջուկային գործարքի հակառակորդները փորձում են անառողջ մթնոլորտ ստեղծել վերջին փուլի շուրջ եւ ավելի ակտիվ են դառնում հանրային տարածքում», քանի որ բանակցող կողմերը «ավելի են մոտենում ԳՀՀԾ-ի շուրջ համաձայնագրի վերականգնմանը»: