Թուրքիան Սև ծովում գազի որոնման աշխատանքների նոր փուլ է սկսել

Թուրքիան Սեւ ծովում բնական գազի պաշարների երկարաբանահետախուզական հորատման աշխատանքների նոր փուլ է սկսել, հաղորդում է ՏԱՍՍ-ը։  

««Ֆաթիհ» նավը սկսել է երրորդ հետախուզական հորատումը Սեւ ծովում՝ Սաքարյա հանքավայրում։ Աշխատանքներն իրականացվում են 5000 մ խորության վրա եւ կտեւեն 2,5 ամիս»,- թվիթթերի իր էջում գրել է Թուրքիայի բնական պաշարների եւ էներգետիկայի նախարար Ֆաթիհ Դոնմեզը։  

2020 թվականի օգոստոսի 21-ին Թուրքիայի նախագահ Ռեջեփ Էրդողանը հայտարարել է Սաքարյա նահանգի ափերի մոտ բնական գազի խոշոր հանքավայրի հայտնաբերման մասին։ Մոտ ապագայում, ինչպես ասել է Էրդողանը, իշխանությունները կլուծեն այդ հանքավայրում գազի արդյունահանման հետ կապված տեխնիկական հարցերը եւ անմիջապես կսկսեն հորատումը: Այդ ժամանակ գազի նոր պաշարների շուկայական արժեքը նախնական գնահատվում էր 180 մլրդ դոլար։

Թուրքական Turkiye Petrolleri ընկերությունը նախատեսում է 40 հորատում Սաքարյա հանքավայրում, որտեղ պաշարները գնահատվում են 540 միլիարդ խմ։ Թուրքիան մտադիր է այդ մշակումներն ինքնուրույն իրականացնել՝ առանց օտարերկրյա ընկերությունների ներգրավման։