Բժիշկները նշել են «Օմիկրոն»-ով վարակման առաջին ախտանիշները, որոնք ի հայտ են գալիս վարակվածի հետ շփումից անմիջապես հետո

ԱՄՆ-ի, Մեծ Բրիտանիայի և Հարավային Աֆրիկայի բժիշկները թվարկել են կորոնավիրուսի «Օմիկրոն» շտամի ամենաառաջին ախտանիշները: Նրանց հետազոտության արդյունքները հրապարակվել են Express թերթում, փոխանցում է «ՌԻԱ Նովոստին»:

Մասնագետների կարծիքով՝ կոկորդի ցավը, մեջքի ցավը, հոգնածությունը, փռշտոցը, գիշերային քրտնարտադրությունը և մարմնի ցավը կարող են առաջանալ «Օմիկրոն»-ով հիվանդի հետ շփումից արդեն երկու օր հետո։ Առաջին տհաճ զգացողությունների շարքում նշվում է նաև գլխացավը։ Բժիշկները նաև պարզաբանել են, որ երբեմն COVID-19-ի նշաններն իրենց զգացնել են տալիս շատ ավելի ուշ՝ նման դեպքերում վարակվելու և ախտանիշների առաջացման միջև ընկած ժամանակահատվածը տևում է մինչև 14 օր։

Բժիշկները խորհուրդ են տալիս տասը օրով ինքնամեկուսացվել և օրգանիզմում այս փոփոխությունները հայտնաբերելու դեպքում հանձնելկորոնավիրուսային վարակի առկայությունը հաստատող թեստ։

Նշենք, որ SARS-CoV-2 B.1.1.529 մուտացիան, որը նաև հայտնի է որպես «Օմիկրոն» շտամ, հայտնաբերվել է Բոտսվանայում և Հարավային Աֆրիկայում նոյեմբերի վերջին: Այն կրում է S-սպիտակուցի տասնյակ փոփոխություններ, որոնք անհրաժեշտ են պաթոգեն բջիջները վարակելու համար: Գիտնականների կարծիքով, գենոմի բազմաթիվ մետամորֆոզներ վկայում են այս տեսակի բարձր փոխանցելիության մասին: Պատվաստումը մնում է պաշտպանության ամենահուսալի միջոցը։