Զարուհի Փոստանջյանը՝ Հայկ Խանումյանին ծեծի ենթարկելու մասին

Այսօր դաժան ծեծի է ենթարկվել ԼՂ Ազգային ժողովի ընդդիմադիր «Վերածնունդ» խմբակցության ղեկավար, «Ազգային վերածնունդ» կուսակցության նախագահ Հայկ Խանումյանը, ով պահանջում է ԼՂ պաշտպանության բանակի նախկին հրամանատար Սամվել Բաբայանին նշանակել Արցախի նախարար-պաշտպանության բանակի հրամանատար: Տեղի ունեցածի վերաբերյալ այսօր ՀՀ ԱԺ-ում «Ժառանգություն» խմբակցության պատգամավոր Զարուհի Փոստանջյանը հանդես եկավ մեկ րոպեանոց հայտարարությունով, որից հետո զրուցեց լրագրողների հետ՝ իր մտահոգությունը հայտնելով տեղի ունեցածի վերաբերյալ:

«Թե ինչին է միտված այդ ծեծը, չեմ կարող ասել, սակայն կարող եմ ձեր ուշադրությունը հրավիրել նրա վրա, որ երեկ Արցախում տեղի է ունեցել բողոքի ակցիա, որին ներկա է եղել Հայկ Խանումյանը: Նրա նկատմամբ տեղի է ունեցել բռնություն, որը պետք է միանշանակ դատապարտվի»,-ասաց պատգամավորը:

«Եթե նույնիսկ սա սադրիչ գործողություն է, միեւնույն է, փաստ է, որ տեղի է ունեցել բռնություն անձի նկատմամբ՝ հարձակվել են, դաժան ծեծի են ենթարկել՝ պատճառելով մարմնական վնասվածքներ, հետեւաբար, դա դատապարտելի արարք է: Թե ով է սադրել ու ինչպես է դա տեղի ունեցել, որեւէ մեկն այս պահին չի կարող ասել, քանի որ քննություն է ընթանում ու դրա արդյունքներից կարող ենք կողմնորոշվել ու հետո հայտարարություններ անել: Նման հայտարարություն անել ու ասել, որ դա սադրանք է, որեւէ մեկն իրավունք չունի, քանի որ դեռ քննություն է ընթանում: Նման բան կարող են ասել իրավապահ մարմինները՝ ունենալով որոշակի փաստեր»,- ասաց նա: