Փաշինյանի նյարդերը տեղի են տալիս․ քաշքշել են աջակից կուսակցության անդամներին

Դեկտեմբերի 5-ին համամասնական ընտրակարգով ՏԻՄ ընտրություններ են կայանալու նաև Կոտայքի մարզի Գառնի համայնքում, որտեղ ընդամենը երկու քաղաքական ուժ է առաջադրվել՝ իշխող «Քաղաքացիական պայմանագիրը» և նրա կցորդ «Հանրապետություն» կուսակցությունը։ Խոշորացված համայնքը մեծ չէ, պարփակված է Գառնի, Գեղադիր, Գողթ, Հացավան, Ողջաբերդ գյուղերի սահմաններում, ունի 9196 ընտրող։ Թվում էր, այստեղ ընտրություններն անցնելու են «ջան ասելով, ջան լսելով», բայց պարզվում է՝ ամեն գնով հաղթանակ ապահովելու մոլուցքով տառապող իշխանական ուժը որոշել է կանգ չառնել ոչնչի առջև։

Օրեր առաջ Կոտայքի մարզպետ Ահարոն Սահակյանը՝ մի խումբ կուսակիցների հետ, ներխուժել են «Հանրապետություն» կուսակցության շտաբ, հայհոյանքներ հնչեցրել, քաշքշել և ծեծել շտաբի ակտիվիստներին։ Թերևս, այդկերպ փորձել են նաև համայնքում վախի մթնոլորտ սերմանել, իրենց աջակցող Արամ Զավենի Սարգսյանի թիմակիցներին բացատրել, թե ով է տերուտիրականը Գառնիում։ Մեղրիում կրած պարտությունից և քաղաքապետի պաշտոնը կորցնելուց հետո «Քաղաքացիական պայմանագիրը» նույնիսկ իրեն աջակցող կուսակցությանը չի կարողանում ներել մրցակցությունը։ Տրամաբանական կլիներ, եթե Գառնիում կատարվածից հետո «Հանրապետություն» կուսակցությունն այնքան բարոյականություն և արժանապատվություն ունենար, որ հրապարակայնացներ դեպքը, իրազեկեր կատարվածի մասին, հանցագործության մասին հաղորդում ներկայացներ ոստիկանություն։ Բացարձակ․ Արամ Սարգսյանի բուռն միջամտությամբ որոշվել է միջադեպը կոծկել, այդ մասին ոչինչ չհայտնել սոցիալական ցանցերում, չխաթարել ՔՊ-«Հանրապետություն» իդիլիան, որպեսզի Արամ Սարգսյանն էլ շարունակի Հանրային հեռուստաընկերության եթերում գովել Նիկոլ Փաշինյանին և նրա ապիկար թիմին։

Միջադեպի մասին երեկ տեղեկացրել է «Անկախ դիտորդ» կազմակերպությունը, որի ներկայացուցիչ Դանիել Իոաննիսյանը ֆեյսբուքյան իր էջում գրել է, թե հանցագործության մասին հաղորդում է պատրաստում: «Քաղաքական ուժերի, և, առավել ևս, իշխանության մտքով անգամ չպետք է անցնի քաղաքական հարցերը բռնությամբ լուծելը: Գառնիի բռնությունը օգոստոսին Ազգային Ժողովում ՔՊ-ի կազմակերպած բռնության անհետևանք մնալու պտուղներն են»,- նշել է Իոաննիսյանը:

«Հանրապետություն» կուսակցությունն էլ մինչ այս պահը չի արձագանքել Իոաննիսյանի հայտարարությանը, չի հերքել միջադեպը։ Թերևս, վախենում են զրկվել Նիկոլ Փաշինյանի բարեհաճությունից։

Հայկ Գրիգորյան