Պաշտպանության նախկին նախարար Դավիթ Տոնոյանը ևս երկու ամիս կմնա կալանքի տակ
ՔԱՂԱՔԱԿԱՆՈՒԹՅՈՒՆ
Պաշտպանության նախկին նախարար Դավիթ Տոնոյանի պաշտպանական խմբի համար անակնկալ է եղել նախկին պաշտոնյայի կալանքը երկարացնելու մասին Երևանի ընդհանուր իրավասության դատարանի որոշումը: Այսինքն՝ Տոնոյանը դատարանի որոշմամբ ևս երկու ամիս ստիպված է մնալ կալանքի տակ:
Այս թեմայով զրուցել ենք Դավիթ Տոնոյանի փաստաբան Սերգեյ Հովհաննիսյանի հետ։ Անդրադառնալով Դավիթ Տոնոյանի կալանքին փաստաբանն ասաց, որ Քրեական գործի նախաքննությամբ որևէ նոր տվյալ ձեռք չի բերվել և նախաքննական մարմինը միջնորդում է երկարացնել Դավիթ Տոնոյանի կալանքի ժամկետը. «Պաշտպանության նախկին նախարար Դավիթ Տոնոյանը ևս երկու ամիս կմնա կալանքի տակ։ Պաշտպանության նախկին նախարարի կալանքի հարցը քննվել է 3 օրում, որոշումը կայացվել է շաբաթ օրը»:
Փաստաբանը տեղեկացրեց, որ պաշտպանական կողմը բավականին հակափաստարկներ է ներկայացրել ավիացիոն հրթիռների պահանջարկ լինել-չլինելու և պիտանիության վերաբերյալ:
«Ներկայացրել ենք հակափաստարկներ, մեր կողմից ձեռք բերված ապացույցները, բայց շուրջ 15 ժամ տևած միջնորդության քննության արդյունքներով, ի զարմանս մեզ, դատարանը որոշեց, այնուամենայնիվ, բավարարել այն: Մեզ համար դեռ անհայտ է, թե, օրինակ, քննիչի ներկայացրած մեկ տվյալի դիմաց մեր առնվազն երեք դա հերքող տվյալի փաստի պարագայում ինչպես կարող էր կալանքի երկարացման միջնորդությունը բավարարվել։ Օրինակ, ասում են, որ նշված սպառազինությունը ձեռք է բերվել առանց Պաշտպանության նախարարության պահանջարկը հաշվի առնելու, կոպիտ ասած, դա մեզ պետք չի եղել, բայց ձեռք է բերվել, մենք շատ կոնկրետ, լուրջ և հավաստի ապացույցներ ենք ներկայացրել դրա հետ կապված, որոնք որևէ կերպ չեն կարող հերքվել: Մենք բերել ենք լուրջ ապացույցներ, համապատասխան իրավական ակտեր, մասնագիտական լուրջ կարծիք՝ ոչ միայն պահանջարկի հետ կապված, որ այն եղել է, այլև՝ հրթիռների որակի հետ կապված: Այն, ինչ մեղսագրվում է Դավիթ Տոնոյանին, հավատացնում եմ, ընդամենը ենթադրությունների մակարդակում է, և մենք ստիպված ենք այդ ընթադրությունների դեմ պայքարել, ինչը, ամեն դեպքում, ըստ էության հաջող ստացվում է»,- շեշտեց Տոնոյանի պաշտպանը:
Սոնա Գիշյան
