«Պադավատապետություն»․ ինչպե՞ս Փաշինյանը դավաճանեց իր սկզբունքներին
ՎԵՐԼՈՒԾՈՒԹՅՈՒՆՆԵՐ
«Պադավատապետություն. ահա սա է մեր այսօրվա պետական կարգի իրական անվանումը»:
2015թ․ Ազգային ժողովում ընդդիմադիր պատգամավոր Նիկոլ Փաշինյանն այսպիսի բառերով էր գնահատում հաջորդ տարվա բյուջեն։ Դեռ անմորուս ընդդիմադիրը հիշեցնում էր Դանիայի օրինակը, որտեղ ընդամենը 23 ծառայողական մեքենա կա, մինչդեռ Հայաստանում դրանց թիվն անցնում է հազարից։
«Ովքե՞ր են, որ Հայաստանի ժողովրդի հաշվին պետք է ծառայողական մեքենա ունենան: Դուք որ Դանիայում աշխատեիք այնպես, ոնց որ Հայաստանում եք աշխատում, դուք ոչ թե ամեն օր բրանիրովաննի լիմուզինով գործի կգնայիք, դուք ամեն օր պալասատի պիժամայով կգնայիք պրագուլկի. օրը 2 ժամ»,- ԱԺ ամբիոնից բարբաջում էր ընդդիմադիրը:
Պարզվեց՝ պաշտոնյա դարձած Փաշինյանն ինքն էլ դեմ չէ պադավատապետության ղեկավար լինել, նրա օրոք ծառայողական մեքենաների համար ավելի մեծ ծախսեր են արվում, քան նախկինների օրոք։ Հայաստանի կառավարությունը երեկ առանց զեկուցման թույլատրեց Ազգային ժողովին հրատապ, մեկ անձից գնման ընթացակարգով խորհրդարանի նախագահ Ալեն Սիմոնյանի համար գնել բարձր դասի BMW մակնիշի մեքենա։ Դրա համար պետական բյուջեից կծախսվի 90 միլիոն դրամ։ Նոր և գերթանկարժեք մեքենայի գնումը հրատապ է համարվել, թույլատրվել է այն գնել մեկ վաճառողից, առանց մրցույթ հայտարարելու։
2018թ․ իշխանության գալով՝ Փաշինյանը մեկ-երկու անգամ հեծանիվով եկավ աշխատանքի, նրա որոշ կողմնակիցներ էլ սոցցանցերում հրապարակում էին մետրոյով աշխատանքի գալու լուսանկարները։ Արդյունքում Հայաստանը ստացավ ավելի վատ, անսկզբունքային իշխանություն, որը բարոյական արգելակներ չունի իր ընտրողներին խաբելու հարցում, իսկ պաշտոնյաները մանուկ հասակում ունեցած էժանագին երազանքները որոշել են իրականացնել պատերազմում ջախջախված պետության հաշվին։ Այս խայտառակ գնումը երեկ արժանացել է անգամ Փաշինյանի որոշ պաշտպանների քննադատությանը, իրավապաշտպան Լևոն Բարսեղյանը քաղաքական իմաստով հանցագործ արարք է որակել։ Իսկապես, երբ պետությունը անհրաժեշտ գումար չունենալու պատճառաբանությամբ դադարեցնում է վիրավոր զինվորականների բուժօգնությունը, կամ գումար չի հատկացնում խրամատների շինարարության համար, մեր զինվորները ձմռանն ընդառաջ դիրքեր են պահում վրանների տակ, պաշտոնյայի կոմֆորտի համար 90 մլն դրամ հատկացնելը պարզ հանցագործություն է։
Արման Մանասյան
