Նիկոլ Փաշինյանը Սյունիքի համայնքապետերին հավաքել էր մեկ նպատակով

Հայաստանի վարչապետի աթոռը զբաղեցնող անձը՝ Նիկոլ Փաշինյանը նախօրեին կառավարությունում էր հավաքել Սյունիքի մարզի համայնքապետերին, քննարկել մարզի խնդիրները, Սյունիքի տարածքով Ադրբեջանին ճանապարհ տալու հնարավորությունները։ Պաշտոնական հաղորդագրության մեջ կցկտուր ձևակերպումներ են, հստակ որևէ բան նշված չէ, սակայն մամուլի տարբեր միջոցներ զրուցել են հանդիպմանը մասնակցած համայնքապետերի հետ, լսել նրանց մտահոգությունները։

Ըստ էության, Փաշինյանը համայնքապետերին միայն մեկ նպատակով էր հավաքել․ Սոչիում Ադրբեջանի նախագահի հետ հանդիպումից առաջ հանրությանը ցույց տալու, թե տիրապետում է իրավիճակին, իսկ համայնքապետերը գտնվում են իր վերահսկողության ներքո։ Սյունիքի գործող համայնքապետերից մի քանիսը կալանավորված են ընդդիմադիր քաղաքական գործունեության համար, ընդդիմության որոշ ներկայացուցիչներ էլ հաղթանակ են տարել վերջին ՏԻՄ ընտրություններում, ինչը լրացուցիչ բարդություններ է առաջացնում «Քաղաքացիական պայմանագրի» համար՝ Ադրբեջանին իր պահանջած միջանցքը տալու համար։ Թեպետ Նիկոլ Փաշինյանը պնդում է, որ որևէ միջանցք չի լինելու, ընդամենը սահմանագծումից և սահմանազատումից հետո տրանսպորտային ապաշրջափակում է իրականացվելու, ինքն էլ խոստովանում է, թե լուրջ ճնշումների տակ է գտնվում միջանցքի հարցում։

Տաթև համայնքի ղեկավար Սամվել Լալայանը պատմել է, որ Փաշինյանը խոսել է նաև Ադրբեջանին միջանցք տալու մասին հայտարարություններին. «Ասաց՝ ուղղակի ճանապարհները մտածում ենք ոնց անենք, որ հարաբերությունները լինեն առանց պատերազմի ու կոնֆլիկտի։ Փաշինյանն ասաց, որ միջանցք չի լինելու, մենք պետք է փոխհամաձայնության գանք գոնե եթե ճանապարհ տանք, բայց առայժմ դրա մասին էլ խոսակցություն չկա»։

Եվ այժմ Փաշինյանը փորձում է Սյունիքի համայնքապետերին էլ իր հետ հավասար հանցակից դարձնել այդ դավադիր ծրագրում, առնվազն հանրությանը ցույց տալ, թե համայնքապետերը խելոք լսում են իր խոսքը, իր մտնելուց հարգում-ոտքի են կանգնում, թեժ բանավեճի մեջ չեն մտնում։ Սյունիքի մարզի համայնքապետերն իրենք էլ տարակուսած են իշխանության՝ այս հանկարծակի բուսնած բարեհաճ վերաբերմունքից, իրենց լսելու պատրաստակամությունից։ Իրականում սա Փաշինյանի դավադիր ծրագրի միայն մի փոքր դրվագն է, իսկ այդ ծրագրի մանրամասները հայտնի կդառնան մեկ-երկու օրից։

Սպարտակ Ավանեսյան