Ղազինյանի առաջադրումը փորձում են կանխել` օրենքը փոխելով

Ազգային ժողովի պաշտպանության և անվտանգության հարցերի հանձնաժողովի տեղակալ ընտրելու ընդդիմության տասնյակից ավելի փորձերին վերջ տալու համար իշխանությունը շրջանառության մեջ է դրել կանոնակարգ օրենքի փոփոխություն, որը թույլ կտա ընդդիմադիր թեկնածուին մեկ անգամ չընտրելուց հետո այլ թեկնածուի առաջադրել։ Հիշեցնենք, այս շաբաթ արդեն 12-րդ անգամ հանձնաժողովի իշխանական անդամները դեմ քվեարկեցին «Հայաստան» դաշինքից պատգամավոր Արթուր Ղազինյանի թեկնածությանը։

Այժմ էլ, իրավիճակն իրենց օգտին լուծելու համար, «Քաղաքացիական պայմանագիրը» նախագիծ է մշակել։ Հեղինակը «Նավակ ճոճող» մականունով Վիլեն Գաբրիելյանն է, և այդ նախագծով՝ հանձնաժողովի նախագահի տեղակալի համար առաջադրված նույն թեկնածուին այլևս հնարավոր չի լինի կրկին առաջադրել, մեկ անգամ նրան չընտրելուց հետո ընդդիմադիր խմբակցությունը պետք է հինգ աշխատանքային օրվա ընթացքում նոր թեկնածուի առաջադրի։ Գործող օրենքով այս պաշտոնը ընդդիմությանն է, այս մասով փոփոխություն Գաբրիելյանը չի առաջարկել։

ԱԺ հանձնաժողովի իշխանական անդամները հստակ հրահանգ ունեն՝ ամեն գնով չընտրել Արթուր Ղազինյանին։ Օրենսդրական եղանակով նրա առաջադրումը կանխելու սպառնալիքները Անդրանիկ Քոչարյանն ու մյուսները վաղուց էին տալիս, այժմ արդեն անցել են հակասահմանադրական գործողությունների։ Նիկոլ Փաշինյանն անձամբ է հրահանգել չընտրել Ղազինյանին, և հանձնաժողովն էլ, ծաղրի առարկա դառնալով, գլխահակ կատարում է այդ ապօրինի հրահանգը։ Անդրանիկ Քոչարյանն էլ փորձում է սադրել ընդդիմությանը, անընդհատ պահանջներ է ներկայացնում, թե հանձնաժողովի փոխնախագահ պետք է դառնա «Հայաստան» խմբակցության ղեկավար Սեյրան Օհանյանը։ Նախ, օրենքն է թույլատրում խմբակցության ղեկավարին չանդամակցել որևէ հանձնաժողովի։ Երկրորդն էլ, պաշտպանության նախկին նախարարի, գեներալ-գնդապետի համար վիրավորական է լինել անբարեհունչ մականունով Անդրանիկի տեղակալը։ Արդյունքում հաղթում է ընդդիմությունը, սակայն իշխանականների անձեռնահասության և կամակատարության հետևանքով խոչընդոտվում է կարևորագույն հանձնաժողովի աշխատանքը։ Թերևս, հենց դա է Նիկոլ Փաշինյանի իրական նպատակը։

Վարդան Ներսեսյան