«Քրեածին պայմանագիր»․ Նիկոլ Փաշինյանը ՏԻՄ ընտրությունների է գնում հանցագործների ուղեկցությամբ

2018 թվականի իշխանափոխությունից անցել է երեք տարուց քիչ ավելի ժամանակ և կարելի է հստակ արձանագրել՝ «Քաղաքացիական պայմանագիր» կուսակցությունը քրեական ենթամշակույթի կրող է, քրեական տարրերի հավաքածու, որը որևէ կապ չունի հեղափոխության, հեղափոխական գաղափարների, ժողովրդավարական արժեքների հետ։

Դեկտեմբերի 5-ին կայանալիք ընտրություններում մի ամբողջ շարք համայնքներում իշխող ուժը որպես քաղաքապետի թեկնածուներ առաջադրել է կոռուպցիայի և քրեական պատմությունների մեջ թաթախված անձանց։ Արագածոտնի մարզի Աշտարակ քաղաքում ՔՊ ընտրացուցակը գլխավորող Թովմաս Շահվերդյանը, օրինակ, Քասախի կիրճում գտնվող 792 քմ հողամասը մոտ 1,9 միլիոն դրամով վաճառել էր հարազատ եղբորը, մինչդեռ օրենքը հստակ արգելում է նման գործարքը։

Մասիսում ցուցակը գլխավորում է ԵԿՄ անդամ Սայեն Հայրապետյանը, ով մի քանի կուսակցություն էր փոխել, ԵԿՄ ղեկավարությանն էլ 2008-ին մեղադրում էր Տեր-Պետրոսյանի գլխավորած համաժողովրդական շարժմանը աջակցելու մեջ։ Մասիսի Սայադը նույնիսկ հասցրել էր ԵԿՄ-ն լքել՝ Հայկազ Բաղմանյանի և այլոց հետ։

Արարատի իշխանական թեկնածուն Ասլան Ավետիսյանն է։ Վերջինիս մասին կարելիէ կարդալ՝ որոնողական համակարգերում, որոնել տեղեկություններ 2013 թվականին կախված հայտնաբերված Արարատի բնակիչ Գյանջիրով Հովհանյանի մասին։

Արթիկում ՔՊ-ի թեկնածու, գեներալ Մանվելի սանիկ Անանիկ Ոսկանյանը` ի դեպ, անցում էր տուշոնկաների հայտնի գործով, Պեմզաշենի նրա տունը խուզարկել էին 2018-ին։

Ամասիայում ցուցակը գլխավորող Մերգել Ղարիբյանին իր համագյուղացիները մեղադրում են մտերիմներին ապօրինի կերպով հողակտորներ տալու մեջ, Ջերմուկի թեկնածու Վահագն Արսենյանը մեղադրվում էր ապօրինի կերպով զինծառայությունից խուսափելու մեջ, Վայքում առաջադրված թեկնածուն՝ Մխիթար Մաթևոսյանն էլ մեղադրյալ է եղել պետությանը խոշոր վնաս հասցնելու գործով։

Եթե ՀՀ քաղաքացիներին թվում է, թե այսպիսի անցյալ ունեցող թեկնածուներով կարողանալու են արդարություն հաստատել երկրում, կարելի է անկեղծորեն ցավակցել նրանց։ Իսկ Նիկոլ Փաշինյանը վաղուց արդեն կորցնելու բան չունի, թաքցնելու բան չունի։ Նա վերածվել է սովորական խեղկատակի, ով, հայտնվելով իշխանության ղեկին, պատրաստ է տրորել ցանկացած սկզբունք ու գաղափար՝ այդ իշխանությունն ամեն գնով պահպանելու համար։ 

Հակոբ Մկոյան