Փաշինյանը գրոհով է վերցնում կրթական հաստատությունները

Վաղուց այլևս զարմանք չի հարուցում այն հանգամանքը, որ Նիկոլ Փաշինյանն ու իր թիմը կատարելագործում և զարգացնում են նախկին արատավոր ավանդույթները, մինչդեռ իշխանության են եկել՝ քննադատելով դրանք։ Նոր որակի կրթություն և բարեփոխումներ խոստացող քաղաքական ուժը ոչ միայն բավարար կամք ու ցանկություն չունեցավ բարեփոխումներ իրագործելու, այժմ էլ գրոհով վերցնում է խոշոր ուսումնական հաստատությունները՝ դրանք համարելով լուրջ սպառնալիք իր դավաճան իշխանության դեմ։

Նախօրեին ԵՊՀ գիտխորհրդի նիստերի դահլիճում տեղի է ունեցել «Երևանի պետական համալսարան» հիմնադրամի նոր ձևավորված հոգաբարձուների խորհրդի անդրանիկ նիստը: Նիստի ընթացքում հոգաբարձուների խորհրդի նախագահ ընտրվել է ՀՀ փոխվարչապետ Սուրեն Պապիկյանը, իսկ քարտուղարի պաշտոնում՝ Մարդու իրավունքների եվրոպական դատարանում Հայաստանի Հանրապետության ներկայացուցիչ Եղիշե Կիրակոսյանը: ԵՊՀ հոգաբարձուների խորհուրդը նաև որոշել է չեղարկել ռեկտորի ընտրության՝ նախկինում չկայացած մրցույթը, փոփոխություն իրականացնել ռեկտորի ընտրության կանոնակարգում և հայտարարել նոր մրցույթ: Այսպիսով՝ ռեկտորի ընտրությունը տեղի կունենա դեկտեմբերի 17-ին: Իշխանության սրտի թեկնածուն նախկին պատգամավոր Հովհաննես Հովհաննիսյանն է։

Հոգաբարձուների խորհրդի նախագահի ու քարտուղարի ընտրություն է եղել նաև Խաչատուր Աբովյանի անվան հայկական պետական մանկավարժական համալսարանում: Հոգաբարձուների խորհրդի նոր կազմով առաջին նիստի ընթացքում նախագահ է ընտրվել ԿԳՄՍ նախարարի տեղակալ Ժաննա Անդրեասյանը՝ Հանրային հեռուստատեսության մեկնաբան Պետրոս Ղազարյանի կինը։

Տարիներ շարունակ ԵՊՀ դասախոսները զգուշացնում էին, որ Նիկոլ Փաշինյանը ջանքեր է գործադրում բուհերում դիմադրության օջախները վերացնելու, ՔՊ ազդեցությունը մեծացնելու, ֆինանսական հոսքերը վերահսկելու ուղղությամբ։ ՀՀԿ իշխանության տարիներին հոգաբարձուների խորհրդի նախագահը Սերժ Սարգսյանն էր։ Այդ փաստը բազմիցս է դարձել Նիկոլ Փաշինյանի քննադատության թիրախը։ Այսօր նա իր տեղակալին է գործուղել ԵՊՀ։ Գիտական ակնառու որևէ հաջողություն չունեցած և մինչ իշխանափոխությունը դպրոցում ուսուցիչ աշխատած Պապիկյանին նման կարգավիճակ տալը ծաղր է կրթական համակարգի նկատմամբ։ Ակնկալում ենք, որ Նիկոլ Փաշինյանն էլ շախմատի ֆեդերացիայի նախագահ կհռչակի իրեն։ Ի՞նչ պակաս թեկնածու է որ․․․

Խաչատուր Սահակյան