Երկու ուշագրավ հայտարարություն Ռուսաստանից

Մինչ Ադրբեջանի իշխանությունները շարունակում են նոր պահանջներ ներկայացնել Հայաստանին և ճնշումներ բանեցներլ, Ռուսաստանի իշխանությունները երեկ երկու ուշագրավ հայտարարություն են արել, որոնք անհնար է անուշադրության մատնել։ ՌԴ ԱԳՆ-ն է հայտարարություն տարածել 2020 թվականի նոյեմբերի 9-ին Ռուսաստանի, Հայաստանի և Ադրբեջանի ղեկավարների կողմից Ղարաբաղի վերաբերյալ եռակողմ հայտարարության ստորագրման տարեդարձի կապակցությամբ, նշել, թե ռուսական կողմը չի հավակնում Հայաստանի և Ադրբեջանի հետ հաղորդակցության մենաշնորհի, թեև այդ երկրների և ժողովուրդների հետ մեզ կապում է երկար և սերտ բարեկամությունը, լայնածավալ գործընկերությունը բոլոր ուղղություններով։

ՌԴ ԱԳՆ-ն ուշադրություն է հրավիրել այն փաստի վրա, որ եռակողմ հայտարարության ընդունումից մեկ տարի անց կարելի է միանշանակ հերքել սոցիալական ցանցերում տեղեկատվական լցոնումներն այն մասին, որ Ռուսաստանի խաղաղապահ ջանքերն ուղղված են, իբր, Լեռնային Ղարաբաղը Ադրբեջանին հանձնելուն և Հայաստանը պրոտեկտորատի վերածելուն։

«Նման հայտարարությունները կրում են պոպուլիստական բնույթ, կատարում են միանգամայն ակնհայտ արտաքին պատվեր և իրականության հետ կապ չունեն», - նշել են ԱԳՆ-ից։

Մյուս ուշագրավ հայտարարությունն արել է ՌԴ փոխվարչապետ Ալեքսեյ Օվերչուկը՝ Երևանում, Նիկոլ Փաշինյանի հետ հանդիպմանը։ Նշելով, որ ՀՀ և Ադրբեջանի փոխվարչապետների հետ անցկացրել են 8 հանդիպում ճանապարհների վերաբերյալ, Օվերչուկն ասել է․ «Այսօր ունենք շատ լավ պատկերացումներ, թե իրականում ինչպիսին է ճանապարհների վիճակը: Հենվելով այդ տվյալների վրա՝ հոկտեմբերի 22-ին անցկացրած համատեղ աշխատանքային խմբի 8-րդ նիստից հետո, մեզ թվում է, կհանգենք կոնկրետ լուծումների: Դրանք առաջին հերթին հիմնվում են նրա վրա, որ ճանապարհների նկատմամբ ինքնիշխանությունը պահպանվում է այն երկրների մոտ, որոնց տարածքով կանցնեն այդ այդ ճանապարհները»։

ՌԴ փոխվարչապետի այս հայտարարությունը հետևել է Նիկոլ Փաշինյանի դժգոհությանը, թե Ադրբեջանի կողմից հնչող հայտարարությունները, որոնք վերաբերում են միջանցքներին, բացասական են ազդում աշխատանքի արդյունավետության և մթնոլորտի վրա՝ հատկապես հաշվի առնելով, որ եռակողմ հայտարարություններում միջանցքների մասին որևէ խոսք չկա: Փաշինյանի տպավորությունն այն է, որ «Ադրբեջանը փորձում է պարտադրել իր ընկալումները հանձնաժողովին և դա, իհարկե, անընդունելի է մեզ համար»:

Ըստ էության, Ռուսաստանն այս հայտարարություններով փորձում է զսպել Ադրբեջանի՝ առանց այն էլ մեծ ախորժակը, բացատրել, որ խնդրի կարգավորման բանալիները գտնվում են ոչ թե Ադրբեջանի կամ այլ երկրների, այլ բացառապես Ռուսաստանի ձեռքում։

Ռոման Հակոբյան