Կորոնավիրուսի դեմ պատվաստանյութերի արդյունավետությունը կրճատվել է. հետազոտություն

Կորոնավիրուսի դեմ պաշտպանությունը, որն ապահովվում է ցանկացած տեսակի պատվաստանյութերով, կրճատվել է 2021 թվականի փետրվարին 87,9 տոկոսից հասնելով 48,1 տոկոսի արդեն իսկ հոկտեմբերին: Այդ մասին նախազգուշացնում են Տեխասի համալսարանի Առողջապահության գիտական կենտրոնի, Վետերանների հարցերով բժշկական կենտրոնի եւ Հանրային առողջապահության ինստիտուտի գիտնականները:

Science-ի հաղորդմամբ՝ նշյալ գիտնականները վերլուծել են պատվաստանյութի արդյունավետությունն ԱՄՆ 780 225 վետերանների շրջանում: Իմունային պաշտպանության կրճատումը գնահատվել է 2021 թվականի փետրվարի 1-ից մինչեւ 2021 թվականի հոկտեմբերի 1-ը, ինչը, համապատասխանում է ԱՄՆ-ում SARS-CoV-2 դելտա տարբերակի տարածմանը: Այդ տարբերակի տարածումը հանգեցրել է վարակների թվի աճին, երբ COVID-19-ի ախտանշաններն ի հայտ են գալիս վերջերս պատվաստված մարդկանց շրջանում:

Հետազոտության համաձայն՝ ամենաշատը կրճատվել է Janssen (Johnson & Johnson) պատվաստանյութի արդյունավետությունը. վարակից պաշտպանումը կրճատվել է 86,4 տոկոսով մարտին՝ հասնելով 13,1 տոկոսին արդեն սեպտեմբերին: Pfizer/BioNTech-ի ցուցանիշների անկումը կազմել է 86,9 տոկոսից մինչեւ 43,3 տոկոս, իսկ Moderna-ի դեպքում՝ 89,2 տոկոսից 58 տոկոս:

Այդուհանդերձ, մասնագետների խոսքով, ցանկացած տիպի պատվաստանյութերը շարունակում են ապահովել պատվաստվածների զգալի պաշտպանությունը մահվան ռիսկից:

Կորոնավիրուսային վարակի հետեւանքով մահվան ռիսկն ամենաբարձրն էր չպատվաստված վետերանների շրջանում՝ անկախ տարիքից եւ ուղեկցող հիվանդություններից: 65 տարեկանից ցածր մարդկանց համար պատվաստանյութերի արդյունավետությունը մահվան վտանգը կանխարգելելու հարցում կազմել է 81,7 տոկոս: 65 տարեկանից բարձր մարդկանց դեպքում այդ ցուցանիշը փոքր-ինչ ցածր էր եւ հավասար 71,6 տոկոսի:

Հետևեք NEWS.am Medicine-ին Facebook-ում և Twitter-ում