Ադրբեջանը շարունակում է ճնշումները, իսկ Հայաստանի իշխանությունների ձայնը չի լսվում

Մինչ Հայաստանի գործող իշխանությունները հեզաճկուն կերպով փորձում են հերքել, թե նոյեմբերի 9-ին որևէ փաստաթուղթ է ստորագրվելու Հայաստանի, Ռուսաստանի և Ադրբեջանի միջև, Ադրբեջանը շարունակում է ճնշումներ բանեցնել, որպեսզի վերջապես ստանա իր բաղձալի համաձայնությունը։

«Հայաստանն առայժմ անպատասխան է թողնում խաղաղության պայմանագրի շուրջ Ադրբեջանի առաջարկները», - երեկ հայտարարել է Իլհամ Ալիևը Բաքվում անցկացվող «Աշխարհը Covid-19-ից հետո» խորագրով ֆորումի ժամանակ:

«Հիմա մենք հետկոնֆլիկտային իրավիճակում ենք և խաղաղության պայմանագրի շուրջ աշխատանքներ սկսելու համար մի շարք առաջարկներ ենք արել Հայաստանին, քանի որ մենք ուզում ենք խոսել ոչ թե պատերազմի, այլ խաղաղության և ապագայի մասին: Ցավոք, այս առաջարկը դեռ անպատասխան է մնում: Միևնույն ժամանակ, մենք առաջարկել ենք աշխատանքներ սկսել մեր սահմանների դելիմիտացիայի և դեմարկացիայի ուղղությամբ՝ երկու երկրների տարածքային ամբողջականության սկզբունքի հիման վրա, որը համապատասխանում է միջազգային իրավունքի նորմերին: Եվ այս առաջարկը ևս չի քննարկվում», - ասել է Ալիևը և հավելել, թե հիմա ամեն ինչ կախված է Հայաստանի դիրքորոշումից. - «Մեր դիրքորոշումը լիովին հստակ է: Այսօր ես ևս մեկ անգամ հայտարարում եմ, որ մենք պատրաստ ենք սկսել խաղաղության մասին երկխոսությունը, աշխատել խաղաղության պայմանագրի շուրջ, մենք պատրաստ ենք շրջել այս էջը, սկսել սահմանազատման գործընթացը: Բայց ինչպես տեսնում եք, Հայաստանից պատասխան չկա: Ավելի քան մեկ տարի նրանք լուռ են մնում: Չեմ կարծում, որ նրանք հիմա այն իրավիճակում են, որ ընդդիմանան Ադրբեջանի կառուցողական մոտեցմանը»։

Եթե սրան էլ գումարում ենք ՌԴ պատկան մարմինների կողմից «3+3» ձևաչափի շուրջ աննախադեպ ակտիվացումը, ապա կարելի է ենթադրել, որ հեռու չէ նաև այդ խաղաղության համաձայնագրի ստորագրման ժամկետը։ Միակ բանը, որ ՀՀ ԱԳՆ-ն դեռ կարողացել է հերքել, համաձայնագիրը հենց նոյեմբերի 9-ին ստորագրելու հանգամանքն է։ Այլ մանրամասներ և պնդումներ Հայաստանի իշխանությունները չեն անում, սովորության համաձայն լռում են։ 

Արման Հարությունյան