Կուբանի կամավորները և Ռուսաստանի հայերի միությունը սկսել են համագործակցել
ՀԱՍԱՐԱԿՈՒԹՅՈՒՆ
yugopolis.ru-ն գրում է, որ Կրասնոդարի երկրամասի հայ համայնքի գրասենյակում ստորագրվել է համագործակցության համաձայնագիր Կրասնոդարի երկրամասի «Ռուսաստանի հայերի միություն» համառուսաստանյան հասարակական կազմակերպության տարածաշրջանային մասնաճյուղի և «Կուբանի կամավորներ» տարածաշրջանային հասարակական շարժման միջև։ Պայմանագիրը ստորագրել են կազմակերպությունների ղեկավարները՝ «Կուբանի կամավորներ»-ի կողմից Աննա Զադիկյանը և Կրասնոդարի երկրամասի «Ռուսաստանի հայերի միություն» նախագահ Կամո Հայրապետյանը։
Համաձայնագիրը նախատեսում է երկու կազմակերպությունների փոխգործակցությունը կանոնադրական խնդիրների լուծման գործում, մասնակցությունը սոցիալապես նշանակալի նախագծերի և գաղափարների իրականացմանը, որոնք ուղղված են Կուբանի և երկրի շահերին, Կրասնոդարի երկրամասի բազմազգ բնակչության շրջանում կամավորական գործունեության մասսայականացմանը:
Ռուսաստանի հայերի միության տարածաշրջանային մասնաճյուղը, որի կազմում գործում են ավելի քան քառասուն տեղական մասնաճյուղեր ողջ Կուբանում, իրականացնում է բազմաթիվ սոցիալական ուղղվածություն ունեցող միջոցառումներ, որոնք պահանջում են մասնակցություն, այդ թվում կամավորների: Կամո Հայրապետյանի խոսքով, ստորագրված պայմանագիրը կօգնի հայկական կազմակերպությանը պատրաստել անհրաժեշտ թվով կամավորներ հանձնարարված խնդիրները կատարելու համար։
Մեկ տարի առաջ հիմնադրված «Կուբանի կամավորները», իրենց հերթին, նույնպես կկարողանան ամրապնդել և ընդլայնել իրենց գործունեությունը ավելացնելով շարժմանը մասնակցող կամավորների թիվը։ Ներկայումս կազմակերպությունն ունի ավելի քան 700 կամավոր տարբեր ոլորտներում, տարվա ընթացքում նրա մասնակցությամբ անց են կացվել տարածաշրջանային, դաշնային և միջազգային մակարդակների ավելի քան 130 միջոցառումներ։
Նյութը հրապարակման պատրաստեց Կամո Խաչիկյանը
