Հայաստանն անհամոզիչ է անվանել ադրբեջանցիների իրավունքների խախտման վերաբերյալ Բաքվի մեղադրանքները
ՀԱՍԱՐԱԿՈՒԹՅՈՒՆ
interfax.ru-ն գրում է, որ հայկական կողմի ներկայացուցիչները ՄԱԿ -ի Միջազգային դատարանում կայացած լսումների ժամանակ անհամոզիչ են համարել Բաքվի փաստարկները Երևանի դեմ ժամանակավոր միջոցներ կիրառելու վերաբերյալ:
Այսպես, Մարդու իրավունքների եվրոպական դատարանում (ՄԻԵԴ) Հայաստանի մշտական ներկայացուցիչ Եղիշե Կիրակոսյանը հայտարարել է, որ Ադրբեջանը «անհիմն մեղադրում է Հայաստանին Ադրբեջանի տարածքի ականապատման գործողություններին մասնակցելու մեջ», քանի որ, իր խոսքերով, հայկական կողմը դա չի անում ոչ Ադրբեջանի, ոչ էլ Լեռնային Ղարաբաղի տարածքում: Կիրակոսյանը նշել է, որ Հայաստանի կառավարությունը «ակտիվորեն ձգտում է խաղաղության, կայունության և հաշտության» տարածաշրջանում: Հայկական կողմի ներկայացուցիչները մեկ անգամ չէ, որ լսումների ժամանակ Բաքվի նյութերը անվանել են «անհամոզիչ»:
«Ադրբեջանի հայցը հիմնված է փաստացի սխալ հայտարարության վրա», - ասել է միջազգային իրավունքի պրոֆեսոր Շոն Մերֆին մեկնաբանելով Հայաստանի դեմ միջանկյալ միջոցներ կիրառելու Ադրբեջանի հայցը: Նրա խոսքով Բաքվի փաստարկները հիմնված են միայն «մեկ դեպքի» վրա, երբ հայ զինվորականներն իբր ականապատել են «ադրբեջանական բանակի դիրքեր տանող մատակարարման ուղիները»:
Ինչպես ավելի վաղ հաղորդվել էր, Ադրբեջանը Հայաստանի դեմ հակընդդեմ հայց է ներկայացրել 2021 թվականի սեպտեմբերի վերջին: Իր հայցում Ադրբեջանը նշում է, որ «Հայաստանը մասնակցել և մասնակցում է մի շարք խտրական գործողությունների ադրբեջանցիների նկատմամբ ելնելով նրանց ազգային կամ էթնիկ ծագումից»: Բաքուն դատական փաստաթղթերում նշում է, որ Երևանը, ուղղակի և անուղղակի եղանակներով, «շարունակում է էթնիկ զտումների քաղաքականությունը և ատելություն և էթնիկ բռնություն է հրահրում ադրբեջանցիների նկատմամբ»: Ավելի վաղ Հայաստանը, իր հերթին, Ադրբեջանի դեմ վարույթ էր հարուցել ՄԱԿ -ի Միջազգային դատարանում «Ռասայական խտրականության բոլոր ձևերի վերացման միջազգային կոնվենցիայի» հիման վրա:
Նյութը հրապարակման պատրաստեց Կամո Խաչիկյանը
