Եթե անցյալում ամանորյա տոների ժամանակ ավելորդ կիլոգրամներ հավաքելու փորձ ունեցել եք, ապա հիմա հավանաբար մտածում եք, թե այս տարի ինչպես խուսափեք քաշի հետ կապված խնդրից: Դիետոլոգ Վարդանուշ Պետրոսյանի խորհուրդները կարող են օգնել տոների ընթացքում չգիրանալ:

1. Ամանորյա տոները սկսեք ծրագրել դեռեւս ամռանից: Ամռանը պտուղ-բանջարեղենն առատ է, որոնք լավ են հագեցնում, պարունակում են քիչ կալորիաներ եւ օգտակար շատ նյութեր: Ձմռանը դրանց մեծ մասն արդեն չկա, ուստի արժե այն ամռանը պաշարել: Սակայն մասնագետը խորհուրդ չի տալիս պահածոյացնել, քանի որ տնային պայմաններում պատրաստված պահածոները վտանգավոր են, կարող են բոտուլիզմով վարակվելու հանգեցնել: Դիետոլոգի կարծիքով՝ ավելի լավ է բանջարեղենը սառեցնել կամ չորացնել: Ինչ վերաբերում է մրգերին, կարելի է կամ սառեցնել, կամ դրանցից չիր պատրաստել, կարեւորը՝ առանց շաքարի:

2. Փորձեք նոյեմբերին եւ դեկտեմբերին 1-2 կգ նիհարել: Դա հանդարտ արեք, առանց ավելորդ լարվածության եւ խիստ սննդակարգերի: Իսկ ամանորյա տոներից հետո դուք գիրանալու փոխարեն, պարզապես կվերադառնաք ձեր սովորական քաշին:

3. Ամանորյա սեղանին դրեք միայն լավ, օգտակար ուտեստներ, սեղանից հեռացրեք քաղցր գազավորված ըմպելիքները (փոխարենը դրեք ջուր եւ հանքային ջուր), յուղոտ, տապակած ուտելիքները, նաեւ թթվասերով եւ մայոնեզով աղցանները:

4. Հյուր գնալուց առաջ մի փոքր կերեք: Եթե քաղցած չլինեք, հազիվ թե չափից ավելի շատ ուտեք եւ կկարողանաք ավելի գիտակցված սնվել:

5. Ցանկացած ճաշ բանջարեղենից սկսեք: Բանջարեղենը ստամոքսն արագ է լցնում եւ կուշտ լինելու զգացում է ապահովում:

6. Ընտրեք կիտրոնով եւ քացախով համեմված աղցաններ, դրանք ավելի օգտակար են եւ քիչ կալորիական, քան մայոնեզով եւ թթվասերով աղցանները:

7. Չարժե 10-15 ճաշատեսակ համտեսել, ավելի լավ է 2-3 ուտեստ ընտրել եւ միայն դա ուտել ամբողջ ճաշի կամ ընթրիքի ընթացքում: Ուտելիքի մեծ բազմազանությունը օրգանիզմի համար մեծ ծանրաբեռնվածություն է:

8. Հեռու նստեք ավելի գայթակղիչ ճաշատեսակներից:

9. Եթե կուշտ ճաշից կամ ընթրիքից հետո աղանդեր են առաջարկում, ավելի լավ է այն միանգամից չուտել, խնդրեք այն փաթեթավորել եւ ձեր հետ վերցրեք: Դուք այն կարող եք ավելի ուշ ուտել կամ հաջորդ օրը:

10. Սահմանափակեք ալկոհոլային խմիչքների օգտագործումը, իսկ կատարյալն այն կլինի, որ հրաժարվեք: Սպիրտային խմիչք օգտագործելուց հետո ղեկի մոտ նստելը վտանգավոր է, դրանից զատ՝ ալկոհոլը մեծ քանակով կալորիաներ է պարունակում եւ նպաստում է ավելորդ քաշ հավաքելուն:

11. Ջանացեք տոների ընթացքում ավելի շատ շարժվել, պարել, երեխաների կամ ընկերների հետ զբոսնել:

NEWS.am Medicine