Ձախողել տեղեկատվական քաղաքականությունը․ ձեռնարկ՝ լրագրող-վարչապետից

Արցախի և Ադրբեջանի սահմանին երեկ երեկոյան տեղի ունեցած միջադեպը, որի հետևանքով 6 հայ զինծառայողներ էին վիրավորվել, հերթական անգամ բացահայտում է՝ Հայաստանի իշխանությունները՝ Նիկոլ Փաշինյանի գլխավորությամբ, այդպես էլ չսովորեցին նորմալ հարաբերվել սեփական ժողովրդի հետ։ Լրագրող վարչապետ և տասնյակ լրագրողներ ներառող քաղաքական ուժը այդպես էլ չկարողացավ հասկանալ, որ սեփական ժողովրդի հետ հարաբերվելու ամենակարևոր պայմանը անկեղծությունն է, ժամանակին տեղեկատվության փոխանցումը, որպեսզի հանրությունը խուճապի չմատնվի և ծանր իրավիճակներում ստիպված չլինի ապավինել այլ, ոչ պետական աղբյուրներին։ 

Ըստ էության, թվում էր, թե 2018թ. իշխանության գալով, Նիկոլ Փաշինյանը կբարելավի իրավիճակը, սակայն Հայաստանի գործող իշխանությունները տեղեկատվական քաղաքականության և քարոզչության առումով մի քանի տասնյակ, եթե ոչ հարյուրավոր անգամներ զիջում են իրենց նախորդներին։ Տեղեկատվական քաղաքականության առումով խնդիրներ եղել են նաև Սերժ Սարգսյանի, Ռոբերտ Քոչարյանի, Լևոն Տեր-Պետրոսյանի օրոք, սակայն այդ խնդիրները չեն հանգեցրել լրջագույն աղետի։ Տպավորություն է, թե Երևանի պետական համալսարանի ժուրնալիստիկայի ֆակուլտետը այդպես էլ չավարտած վարչապետը բացարձակապես չի հասկանում տեղեկատվության և քարոզչության նշանակությունը և ամեն բան փորձում է անել սեփական «դեղին մամուլի» տրամաբանության մեջ։ Արդյունքում կրկին ու կրկին հանրությունը բախվում է ցավոտ իրականության, խուճապի, հիասթափության հետ։ Կամ էլ գործող իշխանությունները հրաշալի հասկանում են այդ քաղաքականության բոլոր վտանգներն ու սպառնալիքները Հայաստանի համար և միտումնավոր են իրականացնում նման դավադիր քայլեր։ 

Ամեն դեպքում արձանագրենք, որ Նիկոլ Փաշինյանի գլխավորած իշխանությունը ռեալ սպառնալիք է դարձել թե՛ Հայաստանի Հանրապետության անվտանգությանը, թե՛ հայ հասարակության հոգեկան և ֆիզիկական անվտանգությանը։

Նարեկ Մաթևոսյան