Ալիևը մեղադրանքներ է հնչեցրել Իրանի հասցեին
ՄԻՋԱԶԳԱՅԻՆ
«Իրանի հայտարարություններն` Իսրայելի հետ Ադրբեջանի համագործակցության վերաբերյալ իր դժգոհության մասին, ընդամենը պատրվակ են», ասել է Ադրբեջանի նախագահ Իլհամ Ալիեւը:
«Դա ընդամենը պատրվակ է: Դրա պատճառը որոշ այլ երկրների հետ մեր հարաբերությունների մեջ չէ, քանի որ մեր արտաքին քաղաքականությունը շատ բաց, թափանցիկ, կայուն և, ինչպես ասացի, անկախ է: Ոչ մի երկիր չի կարող ազդել Ադրբեջանի որոշումների վրա և չպետք է փորձի դա անել», - ասել է Ալիևը իտալական La Repubblica հրատարակությանը տված հարցազրույցում:
Երկրի ղեկավարը նշել է, որ «եթե ինչ-որ մեկը փորձում է արհեստական պատրվակներ օգտագործել և Ադրբեջանին մեղադրել այլ երկրի հետ հարաբերությունների մեջ, ապա այդ փորձերն ապարդյուն են»:
Ալիևն Իրանից պահանջել է հարգել Ադրբեջանի սահմանները, ապա հայտարարել` «մենք չենք խախտում այլ երկրների սահմանները»:
Նա նաև նշել է, թե իբր իրանական բեռնատարներն անօրինական կերպով մուտք են գործում Արցախ:
Թեհրանի եւ Բաքվի միջեւ լարվածությունը նկատվում է սեպտեմբերի կեսերից: Իրանի իշխանությունները մտահոգություն են հայտնել Ադրբեջանի մի շարք սահմանամերձ շրջաններում Իսրայելի ենթադրյալ ներկայության կապակցությամբ: Ադրբեջանի իշխանություններն, իրենց հերթին, հերքում են այս մեղադրանքները եւ դրանք համարում են «անհիմն»:
