Ադրբեջանը ռազմատենչ հայտարարություններ է անում, դու ասում ես՝ եկեք խաղաղ լինենք, նույնիսկ օդային սահմանն ես բացում և հիմք պատրաստում երկրի վերջնական կապիտուլյացիայի. Աննա Գրիգորյանը՝ իշխանությանը
ՔԱՂԱՔԱԿԱՆՈՒԹՅՈՒՆ
Սա առաջին միջանցքն էր, որ տրվեց Ադրբեջանին, ես կարծում եմ՝ այսօր հարցուպատասխանի ընթացքում այդ հարցը կհնչեցվի, և մենք կփորձենք հասկանալ՝ թե, ի վերջո, ինչ պայմաններում է ստացվել, որ օդային միջանցք է տրամադրվում: Այս մասին լրագրողների հետ ճեպազրույցում ասաց ԱԺ «Հայաստան» խմբակցության պատգամավոր Աննա Գրիգորյանը՝ անդրադառնալով տեղեկություններին, թե ՀՀ-ն բացել է օդային սահմանը Ադրբեջանի համար:
«Իրանը փակում է օդային սահմանը, իսկ ՀՀ-ն, որ բազմաթիվ խնդիրներ ուներ Ադրբեջանի հետ, առանց այդ խնդիրները լուծելու տալիս է օդային միջանցք, մենք պարզաբանումներ կստանանք»,-ասաց նա։
Ըստ Գրիգորյանի՝ իշխանափոխությունն անխուսափելի պետք է լինի: «Իշխանությունն ընտրել է հետևյալ գործելաոճը՝ որևէ բան չանել մարտահրավերներին ընդառաջ: Ադրբեջանը ռազմատենչ հայտարարություններով է հանդես գալիս, դու ասում ես՝ եկեք խաղաղ լինենք, նույնիսկ օդային սահմանն ես բացում և փաստացի կերպով հիմք ես պատրաստում նոր կապիտուլյացիայի և երկրի վերջնական կապիտուլյացիայի: Սա մեզ համար անընդունելի է, և սրա դեմ մենք պայքարելու ենք, լինի խորդհրդարանում, փողոցում, թե այլ հարթակներում»,-ասաց նա:
Պատգամավորը խոսեց նաև «Հայաստան» դաշինքի կալանավորված անդամների մասին՝ նշելով, թե կարողացել են տեսակցել Մխիթար Զաքարյանին և Արթուր Սարգսյանին, բայց տեսակցությունները փակ են մյուս գործընկերների՝ Առուշ Առուշանյանի և Մանվել Փարամազյանի հետ:
«Բավական երկար ժամանակ է՝ վերջիններիս հետ չենք կարողացել խոսել: Առուշ Առուշանյանը մասնակցելու է ՏԻՄ ընտրություններին, և ես հույս ունեմ՝ գորիսեցիները, գնահատելով Առուշանյանի՝ վերջին տարիներին կատարած աշխատանքը, ճիշտ ընտրություն կկատարեն»,-ասաց նա՝ նշելով, թե արդեն որևէ մեկի մոտ կասկած չի առաջացնում այն հանգամանքը, որ Առուշանյանի նկատմամբ քաղաքական հետապնդում է:
Ըստ Գրիգորյանի՝ հետապնդումներ են իրականացվում նաև համայնքապետի տեղակալների նկատմամբ, որոնցից մեկն այժմ կալանավորված է:
Պատգամավորը հայտարարեց՝ Գորիսում համայնքապետը աջակցություն է տրամադրել տարբեր բնակիչների, ինչը դիտարկվել է որպես կաշառք, իսկ փոխքաղաքապետ Իրինա Յոլյանի դեպքում՝ բյուջեի վատնում, ինչը, ըստ պատգամավորի, աբսուրդ է:
«Իշխանական պատգամավոր Արմեն Խաչատրյանը հայտարարեց, որ կառավարությունը 1 միլիարդ դրամ ուղղելու է Սյունիքում որոշակի խնդիրների լուծման համար: Ես կարծում եմ՝ ոչ միայն մեկ միլիարդ, այլ ավելի փող պետք է ներդրվի Սյունիքի խնդիրների համար, բայց այդ ինչպե՞ս է ստացվել, որ հենց հիմա է որոշվել՝ ընտրություններից առաջ: Այստեղ կոռուպցիոն որևէ ռիսկ չե՞ք տեսնում, ես տեսնում եմ»,-ասաց Աննա Գրիգորյանը:
