Դու չես կարող տարածաշրջանում խաղաղության դարաշրջան բացել, եթե այդ խաղաղությունը չես կարողանում հաստատել քո երկրում. Ռոբերտ Քոչարյան
ՔԱՂԱՔԱԿԱՆՈՒԹՅՈՒՆ
Այսօր խոսում են տարածաշրջանում խաղաղության դարաշրջան բացելու մասին, սակայն հարց է առաջանում, իսկ դու ո՞վ ես, դու ի՞նչ ես քեզանից ներկայացնում՝ նման նպատակներ հնչեցնելուց առաջ։ Այս մասին մամուլի ասուլիսի ժամանակ, անդրադառնալով Նիկոլ Փաշինյանի կողմից պարբերաբար հնչեցվող խաղաղության դարաշրջան բացելու թեզին, ասաց ՀՀ երկրորդ նախագահ Ռոբերտ Քոչարյանը։
«Զավեշտալին այն է, որ այսօր դու բանակցային սեղանի շուրջ չես նստած, այսօր դու այդ բանակցային սեղանի վրա ես, քեզ են քննարկում առանց քո մասնակցության, դու դադարել ես լինել բանակցային գործընթացի սուբյեկտ, դու վաղուց այդ գործընթացի օբյեկտ ես։ Կա մեկ հանգամանք ևս. դու չես կարող տարածաշրջանում խաղաղության դարաշրջան բացել, եթե չես կարողանում այս խաղաղության դարաշրջանը հաստատել քո երկրում և չես արել որևէ քայլ՝ այդ նպատակին հասնելու համար»,-ասաց նա։
Քոչարյանը նշեց, որ ստեղծված իրավիճակը հնարավոր է փոխել, եթե իշխանությունները հեռանան։
«Ընդհանրապես «չոքած» բանակցելը հարմար չէ, հատկապես չես կարող բանակցել մի մարդու հետ, որը ծաղրում է քեզ»,- ասաց ՀՀ երկրորդ նախագահը։
