Ադրբեջանի և Թուրքիայի նոր ակտիվացումը վտանգներ է պարունակում
ՎԵՐԼՈՒԾՈՒԹՅՈՒՆՆԵՐ
Հայաստանի իշխանությունները շարունակում են դրական ազդակներ տեսնել այնտեղ, որտեղ չկա։ ԱԺ փոխնախագահ Ռուբեն Ռուբինյանը դրական ազդակ է համարել անգամ ադրբեջանցիների կողմից Քասախի երկու բնակիչների առևանգումն ու մեկուկես օր անց հայկական կողմին վերադարձնելը։ Մինչդեռ Թուրքիան և Ադրբեջանը շարունակում են հակահայ հռետորաբանությունը, անգամ ՄԱԿ-ի Գերագույն վեհաժողովի նստաշրջանին։
«Ադրբեջանն օգտագործել է ինքնապաշտպանության իր իրավունքը՝ իր հողերի օկուպացիային վերջ դնելու համար՝ կյանքի կոչելով ՄԱԿ-ի Անվտանգության խորհրդի բանաձևերը, որոնք տարիներ շարունակ չեն իրականացվել»,- Հայաստանի հասցեին նման կեղծ մեղադրանք է հնչեցրել Թուրքիայի նախագահ Ռեջեփ Թայիփ Էրդողանը՝ ելույթ ունենալով 76-րդ նստաշրջանում:
«Այս իրադարձությունը հնարավորությունների պատուհաններ բացեց տարածաշրջանում մշտական խաղաղության վերականգնման համար: Թուրքիան մտադիր է աջակցել կողմերի յուրաքանչյուր դրական քայլին», - ասել է Էրդողանը։
Ադրբեջանի արտգործնախարար Ջեյհուն Բայրամովն էլ հանդիպել է ԱՄՆ պետքարտուղարի քաղաքական հարցերով տեղակալ Վիկտորիա Նուլանդին, և կրկին Հայաստանին մեղադրել Հարավային Կովկասի տարածաշրջանում իրավիճակը սրելու, Արցախի վերաբերյալ եռակողմ հայտարարության պահանջները չկատարելու մեջ։
«Բայրամովը նշել է, որ Ադրբեջանը կառուցողական քայլեր է ձեռնարկել այս ուղղությամբ, սակայն Հայաստանը չի արձագանքել այդ քայլերին», - ասվում է Ադրբեջանի ԱԳՆ հաղորդագրության մեջ: Այս և այլ փաստերը վկայում են, որ թշնամի պետությունները շարունակելու են ճնշել Հայաստանին, դրա համար օգտագործել ռազմական, քաղաքական, դիվանագիտական, լրատվական, տնտեսական հնարավոր բոլոր խողովակները։ Արդեն չենք էլ խոսի, թե ինչ է անում ՀՀ իշխանությունը։ Որովհետև չեղած բանի մասին խոսելն անիմաստ է։
Խաչիկ Լևոնյան
