Գունագեղ շոուն եւ Փաշինյանի անհեթեթությունները
ՎԵՐԼՈՒԾՈՒԹՅՈՒՆՆԵՐ
Երևանի Հանրապետության հրապարակում «Գունագեղ» շոուն ստացվեց։ Նիկոլ Փաշինյանի իշխանությունն ահռելի գումարներ էր ծախսել՝ Անկախության օրը նշելու համար։ Զերծ էին մնացել, թերևս, միայն հրավառությունից, որպեսզի խուսափեն մեղադրանքներից։ Բայց փոխարենը իշխանականները 400 դռոններով գունագեղ շոու էին ապահովել ու հրճվում էին իրենց արածի վրա։ Մի քանի հազար հանդիսականի ներկայությամբ էլ վարչապետի պաշտոնը զբաղեցնող Նիկոլ Փաշինյանը երկար ելույթ ունեցավ, իր խոսքով բանաձևեց մեր կյանքի ու ապագայի ուղենիշը։
Ինչպես և սպասվում էր, ամեն ինչ արեց, որ գոնե իր կողմնակիցների մտքում պարտությունը որպես հաղթանակ ներկայացնի, իսկ 44-օրյա պատերազմում Հայաստանի նվաստացումը հպարտության առիթ դարձնի զոմբիների համար։
«Պատմությունը ցույց է տվել, ապացուցել է, որ հաղթանակը պատերազմում միշտ չէ, որ դարձել է հաղթանակ, նույնկերպ և՝ պարտությունը պատերազմում միշտ չէ, որ դարձել է պարտություն: Մենք մեր պարտությունը պիտի փոխակերպենք հաղթանակի, բայց պիտի փոխակերպենք նաև հաղթանակի մեր բանաձևը, որովհետև՝ պատմությունը դա է ցույց տվել, որ հաղթելու համար պարտադիր չէ, երբեմն նույնիսկ պետք չէ հաղթել ուրիշներին»,- իշխանամետների ուրախության ճիչերի ներքո բարբաջեց Փաշինյանը:
Այս մի քանի ձեւակերպումը լիովին բացահայտում են իշխանության արժեքային համակարգը, վկայում, թե ին վտանգներ է սպառնում նրանց պաշտոնավարումը Հայաստանի Հանրապետության համար։ Երբ երկրում իրապես խեղվում են արժեքները, հաղթանակը, ազգային ոգին, դավադիր իշխանություններն էլ այնքան անամոթություն ու լպիրշություն կունենան պնդելու, թե հաղթանակը հաղթանակ չէ, պարտությունն էլ՝ պարտություն։ Եվ արձանագրենք, որ երեկվա ելույթից հետո Փաշինյանի կողմնակիցները նոր թափով են հարձակվելու ընդդիմախոսների վրա, փրփրակալած բերաններով համոզելու, որ Փաշինյանը ոչ միայն մեղավոր չէ պարտության համար, այլ նույնիսկ այդ պարտությունը պարտություն չէ։ Տղերքն էին ափսոս, որ զոհվեցին․․․ Իսկ հրապարակի շոուն, իսկապես, լավ էր կազմակերպված։ Այդ մի բանը Փաշինյանի իշխանությունը կարողանում է անել։
Սերոբ Կարապետյան
