Փաշինյանի հերթական խոստումը սովորական փուչիկ դուրս եկավ

Հայաստանի գլխավոր դատախազությունը մեկ տարում բացահայտել է ենթադրյալ ապօրինի ծագում ունեցող 90 անշարժ և 19 շարժական գույք, 21 ընկերություններում մասնակցություններ, ինչպես նաև ընդհանուր հաշվարկով 21 մլրդ 721 մլն դրամի չափով գումար: Դատախազության փոխանցմամբ՝ ապօրինի ծագում ունեցող գույքի բռնագանձման մասին օրենքն ուժի մեջ մտնելուց հետո դատախազությունը սկսել և շարունակում է 247 անձի գույքի ուսումնասիրություն:

Դեռևս օրենքն ընդունելիս՝ Նիկոլ Փաշինյանի իշխանությանը զգուշացնում էին, որ այն միայն մահակ է ծառայելու ընդդիմությանը պատժելու համար, իսկ իրավական հիմքերը բավարար չափով ապահովված չեն լինելու անշարժ ու շարժական գույքը, կանխիկ գումարները առգրավելու համար։ Այսօր արդեն ակնհայտ է, որ մի քանի տասնյակ նախկին պաշտոնյաներ և նրանց ընտանիքների անդամները դատական հայցեր են ներկայացնելու գլխավոր դատախազության դեմ։ Սերժ Սարգսյանի եղբորորդին և դուստրը արդեն իսկ հայց են ներկայացրել, դատի են տվել ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությանը, պահանջել են վերացնել ուսումնասիրություն սկսելու մասին որոշումը։

Իշխանափոխությունից հետո Նիկոլ Փաշինյանն ու իր կողմնակիցները տարփողում էին՝ իբր ժողովրդին են վերադարձնելու թալանված հարստությունները։ Իրականում կարողանան ոչ այնքան շատ գումարներ և մի հյուրանոց վերադարձնել։ Հյուրանոցը, ի դեպ, մինչ օրս չի աշխատում, գումարների ճակատագիրն էլ անորոշ մնաց։ Այսօր էլ ապօրինի գույքի բռնագրավման օրենքը, վստահ ենք, չի գործելու, տարիներով դատական քաշքշուկներ են լինելու, արդյունքում նախկիններին կուլակաթափ չեն կարողանա անել, իշխանությունն էլ մեղքը կգցի դատարանների վրա։ Արդյունքում, Նիկոլ Փաշինյանի հերթական խոստումը, ինչպես լինում է նրա գրեթե բոլոր խոստումների հետ, փուչիկ կստացվի։

Արթուր Սողոմոնյան