«Դրական ազդա՞կ»․ Թուրքիան ծաղրում և մեղադրում է Հայաստանի իշխանություններին

Հայաստանի և Թուրքիայի շփումները վաղուց դուրս են եկել ծաղրի և նվաստացման փուլ։ Մինչ Նիկոլ Փաշինյանի իշխանությունը դրական ազդակներ է որսում Թուրքիայի իշխանությունների սպառնալիքներում և պահանջներում, թուրք պաշտոնյաները շարունակում են ծաղրել ՀՀ իշխանություններին։ Թուրքիայի Էսքիշեհիրի նահանգապետարանի նախաձեռնությամբ հանդիպում է տեղի ունեցել Թուրքիայի արտգործնախարար Մևլութ Չավուշօղլուի և մի շարք Հ/Կ-ների ներկայացուցիչների միջև։ Հանդիպման ընթացքում Չավուշօղլուն խոսել է նաև Հայաստանի և հայ-թուրքական հարաբերությունների մասին։ Չավուշօղլուն նշել է, թե իբր իրենք դրական ուղերձներ են հղում և նույնը ստանում Հայաստանից, բայց դրանք, ըստ նրա, չպետք է մնան միայն որպես խոսքեր։ Նա Հայաստանին մեղադրել է հարևան երկրների տարածքների վրա «աչք ունենալու» մեջ և Երևանին հորդորել է մտածել, թե ինչպես կարող է օգուտ քաղել խաղաղությունից, տնտեսական զարգացումից, կարևոր նախագծերից։

Չավուշօղլուն հիշեցրել է Ադրբեջանի կողմից արված խաղաղության համապարփակ պայմանագրի բանակցությունների առաջարկի մասին և հույս հայտնել, որ Հայաստանը կարձագանքի։ Թուրքիայի արտգործնախարարը Հայաստանին մեղադրել է հարևանների հողերի վրա աչք ունենալու համար։

«Եթե Հայաստանը դասեր քաղի տեղի ունեցածից, ապա պետք է հասկանա, որ ոչնչի չի հասնի հարևան երկրի հողեր ներխուժելով կամ իր հարևանների հողերի վրա աչք դնելով»,- ասել է Թուրքիայի ԱԳ նախարարը։

Չավուշօղլուն նշել է, թե անհրաժեշտ է, որ խոսքից գործի վերածվեն Հայաստանի և Թուրքիայի կողմից միմյանց հղվող դրական ուղերձները։

«Մենք տալիս ենք դրական ուղերձներ, որոշ դրական ուղերձներ գալիս են Հայաստանից, բայց այդ դրական ուղերձները չպետք է լինեն միայն բառեր»,- հավելել է Չավուշօղլուն։

Հայաստանի իշխանությունները որևէ կերպ չեն արձագանքել թե՛ այս, թե՛ նախկինում արված նվաստացուցիչ հայտարարություններին։ Փոխարենը ԱԳՆ-ն է սրտի խորը կսկիծով արձանագրել, որ Հայաստանի և Թուրքիայի միջև հարաբերությունների կարգավորման նպատակով բանակցություններ այս պահին չեն վարվում։

«Հայաստանի և Թուրքիայի դիվանագետների միջև շփումները սահմանափակվում են միջազգային օրակարգի տարբեր հարցերի շուրջ բազմակողմ ձևաչափով քննարկումներին մասնակցությամբ», - ասված է ԱԳՆ պատասխանում։

Նույնիսկ դիվանագիտական ասպարեզում ՀՀ իշխանությունները չեն կարողանում պաշտպանել ՀՀ ինքնիշխան շահերը, ուր մնաց սահմանների բացման դեպքում կարողանան պաշտպանել ՀՀ տնտեսական շահերը։

Տիրան Հայրապետյան