Ադրբեջանն է որոշում մեր ճանապարհների դրվածքը․ «պողպատե մանդատակիրները» անհետացել են

Ադրբեջանցի սահմանապահները, Որոտանում անցակետ են դրել և իրանական բեռնատարներից գումար են պահանջում, որ թույլ տան անցնել ճանապարհը: Տեղեկությունը հայտնել էր «Հայաստան» դաշինքի պատգամավոր Վահե Հակոբյանի կինը` Էլիզաբեթ Պետրոսյանը: Միայն դրանից հետո Հայաստանի ԱԱԾ-ն մի մեղմիկ հաղորդագրություն տարածեց, թե երեկ կեսօրից հետո Գորիս-Կապան միջպետական ճանապարհի Որոտան բնակավայրի մոտ Ադրբեջանի վերահսկողության տակ գտնվող Էյվազլի բնակավայրի հատվածում, Ադրբեջանի Հանրապետության ոստիկանության կողմից իրականացվում է իրանական պետհամարանիշներով բեռնատարների վարորդների ու բեռի փաստաթղթերի ստուգում։

 

«ՀՀ ազգային անվտանգության ծառայության սահմանապահ զորքերի և ՌԴ ԱԴԾ սահմանապահ ծառայության զինծառայողների կողմից համատեղ աշխատանքներ են իրականացվում առաջացած իրավիճակը կարգավորելու ուղղությամբ»,- դիվանագիտական նրբանկատությամբ հաղորդել էր ԱԱԾ-ն, որի բուն պարտականությունը պիտի լիներ ՀՀ ինքնիշխան տարածքի անվտանգության ապահովումը։

 

Ադրբեջանցիները նույնիսկ կտրոններ են տրամադրում իրանցի վարորդներին, տերուտիրական զգում իրենց հայկական հողում։ Իսկ Նիկոլ Փաշինյանի գլխավորած իշխանությունը հերթական անգամ սսկվել և չի կարողանում պաշտպանել Հայաստանի սուվերեն շահը, փոխարենը կոտրում է Սյունիքի դիմադրությունը, որ հաճոյանա իր ադրբեջանցի տերերին։ Ամիսներ շարունակ ահազանգում էինք այս մասին։ Սյունիքում ձերբակալեցին Գորիսի քաղաքապետ Առուշ Առուշանյանին, Մեղրիի, Սիսիանի նախկին քաղաքապետերին, այլ համայնքապետերի, որոնք իրենց զորաջոկատներով մինչև պատերազմի վերջին օրը անձնուրաց դիմադրություն ցուցաբերեցին թշնամուն։ Ծեծուջարդով, «մասկի-շոուներով» կոտրում են սյունեցիքների դիմադրությունը, և այսօր գործող իշխանությունների փնթի, անպատասխանատու ու լպիրշ կառավարմամբ հասել են նրան, որ Ադրբեջանն է որոշում՝ Հայաստան իրանական բեռնատար կարո՞ղ է մտնել, թե՞ ոչ։ «Քաղաքացիական պայմանագրի» սյունեցի պատգամավորներն էլ անէացել են՝ ասես, ոչինչ էլ չի եղել։