Թուրք-փաշինյանական մերձեցումը՝ նոր վտանգ Հայաստանի գլխին

Վարչապետ Նիկոլ Փաշինյանն արտառոց «տեսողություն» ունի․ դրական ազդակներ և հարաբերությունների կարգավորման հեանկարներ է տեսնում այնտեղ, որտեղ մյուսները միայն Հայաստանի գլխին կախված վտանգներ են տեսնում։ Կառավարության նիստում Նիկոլ Փաշինյանը հայտարարել է, թե հայկական կողմը Թուրքիայի նախագահի հայտարարություններում տեսնում է Հայաստան-Թուրքիա հարաբերությունները կարգավորելու, հայ-թուրքական երկաթուղին ու ճանապարհները վերագործարկելու մասին խոսելու հնարավորություն։ Ավելին, նա հայտարարել է, թե պատրաստ են նման խոսակցության, որը վերը նկարագրված ֆոնին կարող է ավելի լայն համատեքստ ստանալ։

 

«Մեծ հաշվով խոսքը մեր տարածաշրջանն արևելքն արևմուտքին, հյուսիսը հարավին կապող խաչմերուկ դարձնելու մասին է։ Ուրախությամբ պետք է արձանագրեմ, որ այս գործընթացին ակտիվորեն աջակցելու հրապարակային պատրաստակամություն է ցուցաբերել Ռուսաստանի Դաշնությունը։ Եվրամիությունը, Ֆրանսիան և Միացյալ Նահանգները նույնպես հետաքրքրված են այս գործընթացով»,- ազդարարել է նա, ըստ էության, արձագանքելով Թուրքիայի նախագահ Ռեջեփ Էրդողանի արած այն հայտարաությանը, թե Անկարան պատրաստ է կարգավորել հարաբերությունները Երևանի հետ։

 

Փաշինյանը նույն նիստում նաև խոսել է Ադրբեջանի հետ հարաբերությունները կարգավորելուց, շեշտել, որ Երևանը տրամադրված է Ադրբեջանի հետ սկսել խաղաղ գործընթացը՝ ԵԱՀԿ Մինսկի համանախագահության շրջանակներում։ Անընդհատ շարունակվող այս ռևերանսները Թուրքիայի և Ադրբեջանի ուղղությամբ, հատկապես թշնամական երկրների պահվածքի պայմաններում, վկայում է՝ Նիկոլ Փաշինյանը ինչ-որ հրահանգ ունի ամեն գնով լուծոլ արցախյան խնդիրը, կարգավորել հարաբերությունները Թուրքիայի և Ադրբեջանի հետ, բացել սահմանները։ Իսկ թե ինչ քաղաքական և տնտեսական վտանգներ կարող են լինել, Հայաստանի կառավարությունը որևէ հաշվարկ չի էլ ներկայացրել։