Ո՞րն է գլխավորը քննչական գործողությունների ժամանակ․ Աղվան Հովսեփյանի ձերբակալությունը՝ լակմուսի թուղթ

«Քննչական գործողությունների ժամանակ կարևորը դուրս չգալ ինքդ քո վրա»,- ժամանակին ասում էր ԽՍՀՄ գլխավոր դատախազ Անդրեյ Վիշինսկին։

Հատուկ քննչական ծառայությունն այսօր հայտնեց, որ ձերբակալվել է նախկին Գլխավոր դատախազ, Քննչական կոմիտեի նախկին նախագահ Աղվան Հովսեփյանը։ Հովսեփյանին մեղադրանք է առաջադրվել ձեռնարկատիրական գործունեությանն ապօրինի մասնակցելու, կաշառք ստանալու, խարդախության, հանցավոր ճանապարհով ստացված գույքն օրինականացնելու (փողերի լվացում) հատկանիշներով։

Երեք տարում գործող իշխանություններին հաջողվեց 1,3 միլիարդ դրամի գործ կարել Աղվան Հովսեփյանի վրա, ընդ որում, մեր տեղեկությունների համաձայն, Հովսեփյանի վրա ցուցմունք տալու գործով առավել քան ակտիվ են եղել նրա նախկին հովանավորյալները՝ «Շանթ» գործարանի նախկին սեփականատերերը, որոնք եղբայրներով կռվել էին իրար հետ։ Եվ այժմ եղբայրներից մեկն էլ վրեժ է լուծում Աղվան Հովսեփյանից՝ իրենց հակամարտության ընթացքում մյուս եղբորն աջակցելու համար։ Ոշագրավ է, որ Հատուկ քննչական ծառայությունը գլխավորում է Աղվան Հովսեփյանի ընկերոջ որդին՝ Սասուն Խաչատրյանը, ով այժմ էլ հավակնում է Հակակոռուպցիոն կոմիտեի նախագահի պաշտոնին։ Աղվան Հովսեփյանը ընկերական հարաբերություններ ուներ նաև ՀՀ Գլխավոր դատախազ Արթուր Դավթյանի հոր հետ։ Եվ չափազանց արտառոց կլինի, եթե այս գործի քննության ընթացքում չափազանց հետաքրքիր մանրամասներ հայտնի դառնան։ Իհարկե, հանրությունը դեմ չէ լսելու այդ մանրամասները, բայց արդյո՞ք Հատուկ քննչական ծառայության պետը կողմ կլինի։

Զավեն Մխիթարյան