Նոր զարգացումներ. Սերժ Սարգսյանը դատի է տվել

Հայաստանի երկրորդ նախագահ Սերժ Սարգսյանը հայց է ներկայացրել ընդդեմ իշխանական պատգամավոր Խաչատուր Սուքիասյանի։ Երրորդ նախագահը Սուքիասյանից պահանջում է հերքել իր պատիվն ու բարի համբավն արատավորող տեղեկությունները։ Երկրորդ նախագահը իշխանության սրտի օլիգարխից նաև մեկ միլիոն դրամ փոխհատուցում է պահանջել, որը, փաստաբան Ամրամ Մակինյանի խոսքով, փոխանցելու է  Զինծառայողների ապահովագրության հիմնադրամին։

Հիշեցնենք, որ «Քաղաքացիական պայմանագիր» խմբակցության պատգամավոր Խաչատուր Սուքիասյանն օրեր առաջ Ազգային ժողովի ամբիոնից հայտարարել էր, թե Սերժ Սարգսյանը միլիոնավոր գումարներ է տանուլ տվել խաղատներում, իսկ հաջորդ օրը լրագրողների հետ ճեպազրույցում վերահաստատել էր ասածը։ Սերժ Սարգսյանի փաստաբանն էլ ապացույցներ էր պահանջել։ Նա նաև նշել էր, թե Նիկոլ Փաշինյանի իշխանությունը վաղուց է որդեգրել այդ կեղծ տեղեկությունները տարածելու գործելաոճը։ Նիկոլ Փաշինյանն էլ քարոզրաշավի ժամանակ էր նույնպիսի հայտարարություններ արել, ի պատասխան Սերժ Սարգսյանը Փաշինյանին 24 ժամ էր տվել՝ փաստեր ներկայացնելու համար։

«Թող մի փաստ ներկայացնի, չներկայացրեց, մորթելու եմ», - ամիսներ առաջ պահանջել էր ՀՀ նախկին ղեկավարը:

Տարիներ շարունակ Փաշինյանն ու ընդդիմադիր շատ շրջանակներ տեղեկություններ էին տարածում՝ արատավորելով նախկին նախագահի բարի համբավը։ Թերևս, Սերժ Սարգսյանն էլ ունի մեղքի իր բաժինը։ Ժամանակին դատի չտալու, կեղծ տեղեկություններ տարածողներին պատասխանատվության չենթարկելու պատճառով այդ տեղեկություններն ավելի խորացան հանրության շրջանում, ուստի և այսօր վարչապետի աթոռը զբաղեցնող անձն ու նրա մտերիմ շրջապատը, սեփական աչքի գերանը չտեսնելով, փորձում են վիրավորել արցախյան պատերազմներում իրենց ավանդը ներդրած մարդկանց։ Բնական է, որ օրվա իշխանությունները փորձելու են կեղծիքով, ստով, հայհոյանքներով վնասազերծել իրենց գլխավոր մրցակիցներին, այդկերպ պահպանելով իրենց վտանգավոր իշխանավարումը, պետական ռեսուրսների թալանն ու յուրացումները։

Գագիկ Մնացականյան