Այս տարի անասնակերի շատ լուրջ խնդիր ենք ունենալու. թշնամու կողմից հրդեհված խոտհարքների հարցով դիմել ենք կառավարություն. համայնքապետ
ՀԱՍԱՐԱԿՈՒԹՅՈՒՆ
Գեղարքունիքի մարզի Սոթք, Կութ, Նորաբակ և Ազատ համայնքներում թշնամու սադրանքի արդյունքում բռնկված հրդեհը գրեթե մարվել է, միայն տեղ-տեղ ծխացող օջախներ կան: Այս մասին NEWS. am-ի հետ զրույցում ասաց Գեղամասար համայնքի ղեկավար Հակոբ Ավետյանը։
«Ճիշտ է այս պահին հրդեհը գրեթե մարվել է, բայց քամու դեպքում հնարավոր է այս ծխացող օջախներից կրկին բռնկվի: Այս պահին էլ տարածքում եմ, հաշվում ենք վնասները, թե ինչքան են, որպեսզի ներկայացնենք մարզպետարան և կառավարություն փոխհատուցման համար: Մենք արդեն դիմել ենք, սակայն վնասի չափը լրացուցիչ կներկայացնենք»,- ասաց նա:
Հակոբ Ավետյանը նշեց, որ գյուղացիները խոտհարքներում հասցրել էին մի փոքր հատվածը հնձեին, խոտի մեծ մասը այդպես էլ չեն հասցրել հնձել, և հրդեհների հետեւանքով արդեն այրվել են. «Այս տարի անասնակերի շատ լուրջ խնդիր են գյուղացիները ունենալու»:
Հիշեցնենք, որ Կութ, Սոթք, Նորաբակ և Ազատ գյուղերում խոտածածկ տարածքները այրվում են օգոստոսի 30-ից: Ադրբեջանցիները այս ընթացքում պարբերաբար հրդեհում էին խոտհարքները: Խնդրի մասին բարձրաձայնում էր միայն ՀՀ մարդու իրավունքների պաշտպանը:
