Թուրքիան պահպանում է իր երեք նախապայմանները
ՔԱՂԱՔԱԿԱՆՈՒԹՅՈՒՆ
ՌԴ ԱԳՆ պաշտոնական ներկայացուցիչ Մարիա Զախարովան իր ճեպազրույցի ընթացքում հայտարարել էր, որ ՌԴ-ն պատրաստ է օգնել Թուրքիայի և Հայաստանի միջև հարաբերությունների բարելավմանը:
«Մենք արձանագրել ենք վերջերս դրական ազդակների փոխանակում Երևանի և Անկարայի միջև. նկատի ունեմ՝ արձանագրել ենք այն համատեքստում, որ մենք դրանք տեսել և հաշվի ենք առել: Մենք հիմա էլ ենք պատրաստ ամեն կերպ նպաստել երկու հարևան պետությունների մերձեցմանը՝ հիմնված փոխադարձ հարգանք վրա և հաշվի առնելով միմյանց շահերը»,- ասել է Զախարովան:
Այս թեմայով զրուցել ենք թուրքագետ Հրանտ Մելքոնյանի հետ։
Հարցին, թե արդյո՞ք հնարավոր է թուրքական պետության հետ հարաբերություններ հաստատել թուրքագետը պատասխանել է․ «Թուրքիայի հետ հնարավոր հարաբերությունների հաստատման շուրջ վերջին շրջանում առաջացած աժիոտաժը որևէ կապ չունի Թուրքիայի՝ Հայաստանի դեմ դրած պահանջների հետ, որոնք ինչպես կային 30 տարի առաջ, այնպես էլ նույնությամբ կրկնվում են այժմ։ Թուրքիայի երեք նախապայմանները՝ Ցեղասպանության ճանաչումից հրաժարում, Կարսի պայմանագրի ճանաչում, Արցախի հարցի փակում, շարունակվում են նույնությամբ պահպանվել։ Օրերս Էրդողանն ասաց, որ Թուրքիան պնդում է, թե Հայաստանը պետք է ընդունի, որ գերակայություն է այլ երկրների տարածքային ամբողջականությունը. տարածքային ամբողջականություն ասելով՝ Էրդողանը նկատի ունի Ադրբեջանի տարածքային ամբողջականությունը՝ ներառյալ Արցախը, իր տարածքային ամբողջականություն ասելով՝ նկատի ունի իր տարածքը և մեր կողմից Կարսի պայմանագրի ճանաչումը։ Էրդողանն ասում է, որ պետք է մոռանալ անցյալի հիման վրա թշնամանքի մասին, իսկ դա նշանակում է, որ պետք է մոռանալ Ցեղասպանության մասին, իսկ երբ հավելում է, որ պետք է հրաժարվել միակողմանի մեղադրանքներից, նկատի ունի, որ ոչ միայն հայերն են կոտորվել, այլև՝ թուրքեր։ Այնպես որ, այս երեք նախապայմանները Թուրքիան ներկայացրել է ՀՀ երեք բոլոր նախորդ նախագահներին, հիմա էլ ներկայացնում է Փաշինյանին, որովհետև հիմա կա մի իշխանություն, որոնց համար Ադրբեջանի տարածքային ամբողջականության ճանաչումն ու Ցեղասպանության ճանաչումից հրաժարվելը վատ երևույթ չէ»։
Սոնա Գիշյան
