«Ցավոք, Հայաստանում օրենք կա»․ նախարարի սենսացիոն խոստովանությունը

«Իմ ձեռքը լիներ, կես ժամում արել վերջացրել էի վեթինգը։ Բայց ցավոք սրտի կա օրենք այս երկրում»,- ցնցող այս խոստովանության հեղինակը ոչ այլ ոք է, քան մարդ, ով ի պաշտոնե կոչված է ապահովել օրենքների կիրառումը Հայաստանում։

Արդարադատության նախարար Կարեն Անդրեասյանն այս խոստովանությունն արել է Հանրային հեռուստաընկերության եթերում, և այն ամբողջությամբ բացատրում է օրենքի և օրինականության մասին իշխանության պատկերացումը։ Գաղտնիք չէ՝ Անդրեասյանին արդարադատության նախարարի պաշտոնում նշանակել են՝ օրենքները Փաշինյանի քմահաճույքով մեկնաբանելու և քաղաքական ընդդիմախոսների հետապնդումներն արդարացնելու համար։ Նորանշանակ նախարարն էլ, որ նախկինների օրոք բարձր պաշտոններ էր զբաղեցնում, սերտ կապեր ուներ նրանց հետ, իշխանափոխությունից հետո իր սրտում բացահայտեց սերն առ «հեղափոխական արժեքներ», ու հիմա ամեն ինչ անում է նախկինների կյանքը բարդացնելու համար։

Մեկ այլ հարցազրույցում էր Անդրեասյանը խոսել է ապօրինի ծագում ունեցող գույքից, ասել, թե ապօրինի ծագում ունեցող գույքի հունձք է սպասվում։Նա նշել է, թե նախորդ մեկուկես տարում 300 նախկին բարձրաստիճան պաշտոնյայի գույք է ուսումնասիրվել, որոնցից տասնյակներն արդեն ավարտական փուլում են։

«Հիմա մենք սկսելու ենք կամաց հունձքը բերել ժողովրդին, բայց նաև պետք է ասել, որ այս համակարգը գոյություն չուներ։ Միայն 1-1.5-2 տարի պահանջվեց, որպեսզի օրենսդրական համակարգ մտածվի, թե թալանածը ոչ թե ինչ-որ մեկի մատի շարժումով ոնց բերես ժողովրդին կամ նվեր բերես ժողովրդին, այլ օրինական ճանապարհով գնաս ու գանձես»,- ասել է Անդրեասյանը:

Ըստ էության, իշխանությունը սեփականության նոր վերաբաշխում է իրականացնում, նախկիններից խլելու են տան ներկաներին, իսկ արանքում շարքային քաղաքացուն կհամոզեն, թե ամենն արվում է հանուն ժողովրդի բարօրության։

Գարիկ Նիկողոսյան