Ինչո՞ւ սրտի հիվանդություն ունեցողները պետք է անպայման պատվաստվեն COVID-ի դեմ

Կորոնավիրուսային վարակի դեմ պատվաստումների միակ հակացուցումն ալերգիկ ռեակցիաներն են: Քրոնիկական հիվանդություններ ունեցողներն առաջին հերթին պետք է պատվաստվեն` COVID-19-ի հետևանքները կանխելու համար:

Այս մասին Մոսկվա-Երևան տեսակամուրջի ժամանակ ասել է Ռուսաստանի գիտությունների ակադեմիայի ակադեմիկոս, պրոֆեսոր Բագրատ Ալեքյանը։

Տարիքը պատվաստումների համար հակացուցում չէ: Եթե մարդը սրտի հիվանդություն ունի, նրան պետք է պատվաստել: Հակառակ դեպքում սրտի խնդիրներով մարդը կարող է լուրջ վտանգի առաջ կանգնել։

«Բանն այն է, որ կորոնավիրուսային հիվանդությունը երբեմն թրոմբագոյացման է հանգեցնում։ Այդպիսի դեպքերում սրտի և անոթների հիվանդություններով բուժառուին կարող ենք կորցնել»,-ասաց Ալեքյանը։

Նա նշեց, որ կորոնավիրուսային վարակը հանգեցնում է քրոնիկական հիվանդությունների դեկոմպենսացիայի։ Այդ պատճառով պատվաստումը ցուցված է սրտանոթային հիվանդություններով բուժառուներին։

Նրա խոսքով՝ պատվաստումները թույլ են տալիս խուսափել հիվանդության ծանր ընթացքից և տարբեր բարդություններից: Սակայն մասնագետը անգամ պատվաստվածներին կոչ է անում հետևել հակահամաճարակային նորմերին։

Քանի որ հակամարմինները ժամանակի ընթացքում կրճատվում են, կես տարի անց կարող է կրկնակի պատվաստման կարիք լինել։

Սեպտեմբերի 1-ի դրությամբ աշխարհում կորոնավիրուսային վարակի 218,644,194 հայտնաբերված դեպք կա։ Մահացել է 4,535,408 մարդ, առողջացել՝ 195,490,468 մարդ։ Այս հակառեյթինգում Հայաստանը 82-րդ հորիզոնականում է։