Ռուսաստանի ԱԳ նախարարը ծաղրել է Արարատ Միրզոյանին

Հայաստանի ԱԳ նախարար Արարատ Միրզոյանի առաջին աշխատանքային այցը Մոսկվա հերթական անգամ վկայեց արտաքին աշխարհում Հայաստանի գործող իշխանությունների նկատմամբ ձևավորված խորը արհամարհանքը։ Սերգեյ Լավրովը միանգամից և հանգամանալիորեն բացատրեց Միրզոյանին, թե ո՞վ է «Ալֆան» և ո՞վ «Օմեգան», իսկ ռազմագերիների հարցում նրա հայտարարությունը իսկական ծաղր էր ՀՀ իշխանությունների նկատմամբ։ Միրզոյանի հետ համատեղ ասուլիսում Սերգեյ Լավրովը հայտարարել է, որ ռուսական կողմն Ադրբեջանին կոչ է անում ազատ արձակել բոլոր ռազմագերիներին՝ առանց պայմանների: Միևնույն ժամանակ հենց ինքն է նախապայման առաջ քաշում, որ Հայաստանը պետք է որպես պատասխան քայլ փոխանցի ականապատման քարտեզները։

«Նոյեմբերի 9-ի հայտարարությամբ նշվել է, որ պետք է ազատ արձակվեն այն ռազմագերիները, որոնք այդ պահին են եղել: Այժմ ադրբեջանցիները պահում են հայ զինծառայողների զգալի խմբի, որոնք այնտեղ են հայտնվել նոյեմբերի վերջին՝ հայտարարության՝ ուժի մեջ մտնելուց հետո: Այնուամենայնիվ, Ռուսաստանի նախագահը բոլոր շփումներում, այդ թվում և Իլհամ Ալիևի հետ, այդ ազդակն ուղարկում է: Կոչ ենք անում ադրբեջանական կողմին ազատ արձակել բոլորին առանց նախապայմանների: Դա նշանակալի միջոց կլիներ այն վստահության հաստատման համար, որի կարիքը կա: Դա կարևոր հումանիտար քայլ կլիներ»,- ասել է Լավրովը։

Մի կողմ թողնենք, որ նոյեմբերի 9-ի հայտարարության մեջ քարտեզների մասին բառ անգամ չկա, մինչդեռ ռազմագերիների մասով հստակ նշված է։ Ըստ էության, Լավրովը ակնարկում է, որ հայ ռազմագերիների շարունակվող գերեվարումը Ադրբեջանի կողմից բացառապես Նիկոլ Փաշինյանի մեղքով է, որը անվերապահ կատարել է հայտարարության մեջ նշված բոլոր կետերը, մի բան էլ ավելի, իսկ սեփական ռազմագերիներին չի կարողանում հետ բերել։ ՌԴ-ն էլ իր կողմից է լվանում ձեռքերը՝ ասելով, թե ընդամենը ինչ-ինչ ազդակներ են հղում Ադրբեջանին։ Խոսելով խաղաղության պայմանագրի մասին՝ Ռուսաստանի արտգործնախարարը ասուլիսին հստակ տարանջատեց դելիմիտացիայի հարցը Հայաստան-Ադրբեջան խաղաղ պայմանագրից, երբ առաջին դեպքում ընդգծեց Ռուսաստանի պատրաստակամությունը լիակատար աջակցելու, իսկ երկրորդ դեպքում ուղղակի վերահասցեագրեց հարցը օմեգային: Նաև հստակ մեսիջ տվեց մեզ. եթե Հայաստանը հրաժարվի Արցախից, դա բացառապես ՀՀ գործող իշխանությունների մեղքն է լինելու։ 

Լավրենտ Հակոբյան