Հայաստանի խորհրդարանում պատգամավորները արդեն միմյանց վրա շշեր և աթոռներ են նետում
ՀԱՍԱՐԱԿՈՒԹՅՈՒՆ
tsargrad.tv-ն գրում է, որ Հայաստանի Ազգային ժողովի օգոստոսի 25 -ի առավոտյան նիստին նոր քաշքշուկ է տեղի ունեցել իշխող կուսակցության և ընդդիմադիր պատգամավորների միջև: Բանը հասել է նրան, որ սկսել են միմյանց վրա շշեր նետել: Միջադեպը հրահրել է վարչապետ Նիկոլ Փաշինյանի մերձավորներից մեկը: Իշխող «Քաղաքացիական պայմանագիր» կուսակցության պատգամավոր Հայկ Սարգսյանը, կառավարության ծրագրի քննարկման ժամանակ ունեցած ելույթում «թավշյա հեղափոխությունից» առաջ պաշտպանության նախարարներին «դավաճան» է անվանել, քանի որ շատ քաղաքացիներ «ազատվել են զինվորական ծառայությունից արտոնյալ լինելու շնորհիվ»: «Հայաստան» դաշինք խմբակցության ղեկավար, պաշտպանության նախկին նախարար Սեյրան Օհանյանին ուղղված այդ ակնհայտ ակնարկը ստիպել է ընդդիմությանը հիշեցնել, որ իշխող կուսակցության պատգամավորների մեծամասնությունը, շատ նախարարներ և ինքը՝ Փաշինյանը ևս ժամանակին խուսափել են զինվորական ծառայությունից, բայց անընդհատ խոսում են բանակի թեմայով: Սկսվել է քաշքշուկ, շշեր են թռել միմյանց վրա, սկսվել է ծեծկռտուք: Խորհրդարանի նախագահը կրկին կանչել է զինվորական համազգեստով Պետական պահպանության ծառայության աշխատակիցների, որոնց նիստերի դահլիճում գտնվելու իրավական հիմքը կասկածի տակ է դրվում ընդդիմության կողմից:
Նշենք, որ նախորդ օրը ընդդիմադիր պատգամավոր Աննա Մկրտչյանի նկատմամբ վերջիններիս կողմից ուժ էր կիրառվել, և նա և «Հայաստան» դաշինք խմբակցության օգնության հասած մի շարք տղամարդ գործընկերներ վնասվածքներ էին ստացել և ստիպված են եղել շտապ օգնություն կանչել: Հայաստանի մարդու իրավունքների պաշտպան Արման Թաթոյանը կտրուկ դատապարտել է Պետական անվտանգության ծառայության աշխատակիցների կողմից կին-պատգամավորի նկատմամբ ուժի կիրառումը: Այդ օրը պատգամավորների միջև ծեծկռտուքի ժամանակ նաև աթոռներ են թռել միմյանց վրա: «Հայաստան» և «Պատիվ ունեմ» դաշինքները երեկոյան հանդես են եկել համատեղ հայտարարությամբ, որում ընդգծել են, որ «ընդդիմադիր պատգամավորների նկատմամբ հանցավոր գործողությունները չեն թողնելու առանց իրավական հետևանքների»:
Նյութը հրապարակման պատրաստեց Կամո Խաչիկյանը
