Որ համալսարանում ինչ ձևաչափով է սկսվելու ուսումնական պրոցեսը, ինչ անվտանգության միջոցառումներ են նախատեսված
ՀԱՍԱՐԱԿՈՒԹՅՈՒՆ
ԿԳՄՍՆ-ի դիրքորոշումն այն է, որ դասերը հանրակրթական դպրոցներում լինեն առկա։ Այս մասին ArmDaily.am-ի հետ զրույցում ասաց ԿԳՄՍՆ մամուլի խոսնակ Գեղամ Մելիքբեկյան։ Անդրադառնալով բուհերին՝ նա ընդգծեց, որ դրանք իրենց ակադեմիական ինքնավարության շրջանակում իրենք պետք է որոշեն, թե դասերն ինչպես են անցկացնելու։ «Իհարկե Առողջապահության նախարարը հրամանի նախագիծ է պատրաստել և, երբ այդ հրամանը ուժի մեջ մտնի և հրապարակվի՝ ըստ այդ ցուցումների երևի թե մեր հանրային կյանքում որոշակի փոփոխություններ կլինեն, ընդ որում՝ ոչ միան կրթական համակարգում, այլև հանրային կյանքի մյուս ոլորտներում նույնպես»։
ArmDaily.am-ը փորձեց մի շարք բուհերից ճշտել, թե ինչ կերպ են այդ հաստատություններում կազմակերպելու ուսումնական պրոցեսը։
ԵՊԲՀ աշխատակազմի ղեկավար Շուշան Դանիելյանը մեզ հայտնեց, որ այս պահի դրությամբ Երևանի պետական բժշկական համալսարանը պատրաստվում է նոր ուսումնական տարին սկսել առկա ձևաչափով, որ դասապրոցեսը առկա ձևաչափով կազմակերպելու նպատակով կրթական հաստատությունում խստացվել է համաճարակային վերահսկողությունը։ «Համալսարանի տարածքում դիմակ կրելը պարտադիր է լինելու և դասապրոցեսը կազմակերպվելու է ավելի փոքր թվաքականի խմբերով»,-ասաց Դանիելյանը
Մանկավարժաման համալսարանից մեզ տեղեկացրին, որ այստեղ նույնպես առկա են անելու դասերը՝ խստացված անվտանգության կանոններով: Բայց դեռ ռեկտորատի նիստը ընթացքի մեջ է, ավարտին ցուցումները կլինեն:
Հայ-Ռուսական համալսարանից հայտնեցին, որ 2021/2022 ուսումնական տարվա առաջին կիսամյակի ուսումնական գործընթացի ձևաչափի մասին ՀՌՀ-ի գիտխորհրդի որոշում է կայացրել, որ համալսարանում ուստարվա առաջին կիսամյակի ուսումնական գործընթացն անցկացվելու է խառը՝ հիբրիդային ձևաչափով։ Հոսքային դասախոսությունները, որոնց մասնակիցների քանակը կգերազանցի 40-ը, անցկացվելու են՝ բացառապես օնլայն ձևաչափով։ Բակալավրիատի 1-2-րդ և մագիստրատուրայի առաջին կուրսի դասընթացներն անցկացվելու են առավելապես առկա ձևաչափով։ Բակալավրիատի 3-4-րդ և մագիստրատուրայի երկրորդ կուրսի դասընթացներն՝ առավելապես օնլայն ձևաչափով։ Ասպիրանտուրայում սովորողների համար՝ օնլայն ձևաչափով՝ գիտական ղեկավարների հետ առկա ձևաչափով հանդիպումների հնարավորությամբ։ Օնլայն դասերին ուսանողը համարվելու է ներկա միայն միացրած վեբ-տեսախցիկով, իսկ հակառակ պարագայում՝ բացակա։
ArmDaily.am-ի հարցմանն ի պատասխան Հայաստանի պետական տնտեսագիտական համալսարանից հայտնեցին, որ նոր ուսումնական տարում դասերն իրականացվելու են ցերեկային և հեռավար սկզբունքներով։ Համալսարանի տարածք մուտք գործելիս պարտադիր կատարվելու է ջերմաչափում, մուտքերում սահմանված է անցագրային ռեժիմ, փակ տարածքներում դիմակ կրելու պարտադիր պայման է սահմանված։ Դասերը կազմակերպվելու են 3 հերթով՝ ուսանողների կուտակումները հնարավորինս մեղմելու համար։ Յուրաքանչյուր հերթափոխի վերջում իրականացվելու է լսարանների ախտահանում՝դեզինֆեկցիա։ Յուրաքանչյուր ակադեմիական խումբ կցված է կոնկրետ լսարանի և լսարանների փոփոխություն չի կատարվելու։ Թեստի արդյունք պահանջվելու է, պատվաստման պահանջ կամ թեստի արդյունք տարբերակ կկիրառվի առողջապահության նախարարի հրամանը ստանալուց անմիջապես հետո։
Գեղամ Մելիքբեկյանին հարցրեցինք նաև թե ինչ դիրքորոշում ունի ԿԳՄՍՆ-ն 14 օրը մեկ ՊՇՌ թեստ հանձնելու կամ պատվաստման հավաստագիր ներկայացնելու առնչությամբ։ Նա պատասխանեց, որ ոչ միայն իրենց նախարարությունը, այլև ողջ աշխարհը գնում է նրան, որ մարդիկ պետք է պատվաստվեն, որպեսզի այդ ժանտախտից պրծնենք։
