Ծանոթ ու միաժամանակ անհայտ՝ թիթեղյա տարայով գարեջուր
ՀԱՍԱՐԱԿՈՒԹՅՈՒՆ
Երբեմն տարբեր ըմպելիքների ժողովրդականության վրա կարող են ազդել ոչ միայն նրանց համային հատկությունները, այլ նաև այն ձևը, որով դրանք մատուցվում են: Հետևաբար, արտադրողները փորձում են հնարավորինս բավարարել գնորդների պահանջները: Նույնը տեղի է ունեցել նաև գարեջրի հետ: Գարեջրի վաճառքը ավելի խթանելու համար արտադրողները գտել են հարմար փաթեթավորում` թիթեղյա տարողություն: Արդյունքում, շուկայում հայտնվել է միանգամայն նոր ապրանքատեսակ` պահածոյացված գարեջուր, որն իր համով տարբերվել է ստանդարտից:
Թիթեղյա տարողությամբ գարեջրի պատմությունը սկսվել է 1910 թվականից: Ճիշտ է, այդ ժամանակ և մինչև 1933 թվականը, եղել է Չոր օրենքը, այսինքն արգելվել է սպիրտային ըմպելիքների վաճառքը և օգտագործումը, որն էլ հենց ազդել է այդ գաղափարի ուշ իրականացման վրա: Այնուամենայնիվ, Միացյալ Նահանգներում այդ օրենքի չեղարկումից հետո արտադրողները արագորեն սկսել են հետ բերել կորցվածը: Ընդ որում սկզբից գարեջուրն ավելի ուժեղ մրցակիցներ է ունեցել, որոնք են ավելի թունդ սպիրտային ըմպելիքները, մարդիկ սկզբում քիչ ուշադրություն են դարձրել թույլ ալկոհոլային խմիչքներին: Այդ առումով անհրաժեշտ էր իրականացնել արտադրանքի վաճառքի խթանման մի քանի փուլեր, որոնցից է արտադրանքը ավելի մատչելի և էժան դարձնելը: Դրա լավագույն օրինակը գարեջրի թանկարժեք ապակե շիշը թիթեղյա տարողությամբ փոխարինելն է: Բոլորին է դուր եկել այս գաղափարը, ընդ որում ոչ միայն գինը նվազեցնելու, այլ նաև նոր հարմարավետ փաթեթավորմամբ գարեջուրը գնորդներին հասցնելու տեսակետից:
Gottfried Kreuger գարեջրագործական ընկերության արտադրության մեջ թիթեղյա տարաների օգտագործելու առաջին վեց ամիսներին վաճառքի ծավալն աճել է 6 անգամ: Սա լավ օրինակ է դարձել այլ գարեջրագործների համար, որոնք ևս արագորեն սկսել են անցում կատարել նոր փաթեթավորմանը: Նման հաջողություն չէր կանխատեսում անգամ ամերիկյան Can Company ընկերությունը, որն էլ հենց մշակել և ստեղծել էր այդ թիթեղյա տարաները: Արդյունքում թիթեղյա տարայով գարեջուրը դարձել է Ամերիկայի այնպիսի խորհրդանիշ, ինչպիսին են ջինսը կամ ջազը:
Սկզբում տարաները պատրաստվել են երկաթե թիթեղներից, և դրանք բացվելիս են եղել միայն հատուկ բանալիով, որը վաճառվել է գարեջրի հետ միասին: Բնականաբար գարեջրին ավելացվելիս են եղել որոշակի կոնսերվանտներ, որպեսզի գարեջուրը ռեակցիայի մեջ չմտնի երկաթի հետ: Այդ իսկ պատճառով գարեջուրը ձեռք է բերել նոր համ, որը հատկապես դուր է եկել դրա որոշ երկրպագուներին: Այդպես հայտնվել է գարեջրի նոր տեսակ: Հետագայում, իհարկե, երկաթը փոխարինվել է ալյումինով, որը ավելի պրակտիկ է և թեթև:
Թիթեղյա տարայով գարեջուրը առաջացրել է դրա օգտագործման որոշ ավանդույթներ: Օրինակ, երբ գարեջուրը արդեն խմված է, կա տարան սեղմելու ծես, որը կարծես թե վերջակետ է դնում: Քանի որ ներկայումս պայքար է ընթանում ալկոհոլային արտադրանքների օգտագործման դեմ, և հատկապես թունդ ալկոհոլային խմիչքների, թիթեղյա տարայով գարեջուրն այժմ ոչ միայն խմիչք է, այլ նաև որոշակիորեն կենսակերպ, որն ունի իր սովորություններն ու վարքի կանոնները:
Նյութը հրապարակման պատրաստեց Կամո Խաչիկյանը
