Պատերազմում պարտված երկրի իշխանությունը մտադիր է կրճատել զինծառայության ժամկետը
ՎԵՐԼՈՒԾՈՒԹՅՈՒՆՆԵՐ
Պատերազմում պարտված երկրի իշխանությունը մտադիր է կրճատել զինծառայության ժամկետը։ Այս մասին նշվում է ՀՀ կառավարության 2021-2026 թվականների գործունեության ծրագրում, որն ընդունվել է կառավարության կողմից և առաջիկայում կուղարկվի խորհրդարան: Ըստ այդմ, Հայաստանի կառավարությունը նախատեսում է ռազմավարական հեռանկարում աստիճանաբար անցում կատարել պրոֆեսիոնալ բանակի. ժամկետային և զորահավաքային զինծառայության կառուցվածքն էականորեն կփոխվի:
«Հաշվի առնելով զինվորական ծառայության զարգացման ու կատարելագործման հեռանկարները՝ առաջիկայում Կառավարությունը ձգտելու է զինծառայության ժամկետների կրճատմանը՝ ի հաշիվ պայմանագրային ծառայության աճի։ Սրանով Կառավարությունը խթանելու է զինվորական ծառայության շահադրդման թե՛ նյութական և թե՛ բարոյահոգեբանական մեխանիզմները»,-ասված է ծրագրում:
Ծրագրում, իհարկե, չի նշվում, թե ինչ ժամկետով են կրճատելու զինվորական պարտադիր ծառայությունը։ Ընդգծենք, որ սա հերթական անհեթեթ և վտանգավոր քայլն է, որը ձեռնարկել է Նիկոլ Փաշինյանի ապիկար իշխանությունը։ Տնտեսական բարդ վիճակում հայտնված և պատերազմում պարտված երկրում գրեթե անհնար է բավարար միջոցներ գտնել և անհրաժեշտ քանակությամբ պայմանագրայիններ զորակոչել զինված ուժեր, իսկ զինծառայության ժամկետի կրճատումը սպառնում է նվազեցնել ՀՀ ԶՈՒ անձնակազմի թիվը։ Առանց այն էլ վերջին տարիներին բանակի թվակազմը նվազել էր՝ երկրում ծնելիության մակարդակի նվազման, արտագաղթի, խաղաղ և ռազմական դրության պայմաններում զոհերի մեծ թվի պատճառով։
Նաև բարդ է լինելու շահագրգռել շարքային քաղաքացուն, որ նա թեկուզ գումարի դիմաց զորակոչվի բանակ, հատկապես երբ զինվորականների ռոճիկը չափազանց փոքր է։ Երեք տարվա ընթացքում գործող իշխանությունը բանակում կարող է հպարտանալ միայն սննդի գործընթացի կազմակերպմամբ, թեև դա էլ խիստ վիճահարույց է՝ հաշվի առնելով պատերազմի ժամանակ ծագած լոգիստիկ խնդիրները, դիրքեր սնունդ հասցնելու անհնարինությունը։ Իսկ բանակից արատավոր բարքերն արմատախիլ անելու, կոռուպցիայի դեմ պայքարելու, սպառազինության ձեռքբերման առումով այս իշխանությունը հպարտանալու որևէ առիթ չունի։ Եվ այժմ, ձեռնարկելով այս վտանգավոր քայլը, Նիկոլ Փաշինյանի իշխանությունը հերթական հարվածն է հասցնում ՀՀ Զինված ուժերին։
Դավիթ Զաքարյան
