Կուբանում նախատեսվել է իրականացնել հայոց լեզվի ուսուցիչների մարզային վերապատրաստում
ՀԱՍԱՐԱԿՈՒԹՅՈՒՆ
yugopolis.ru-ն գրում է, որ Կուբանը ընդունված է կոչել հարյուր ժողովուրդների երկիր, որին կարելի է ավելացնել և հարյուր լեզուների երկիր: Պատահական չէ, որ Կրասնոդարի երկրամասի իշխանությունները միշտ էլ վարել են հավասարակշռված և պատասխանատու քաղաքականություն ազգամիջյան հարաբերությունների ոլորտում. գործում են ազգային մշակույթների տարածաշրջանային կենտրոններ, զարգանում են ազգային-մշակութային միավորումները և ստեղծագործական խմբերը, պայմաններ են ստեղծվում ազգային սփյուռքների կողմից իրենց մայրենի լեզվի ուսումնասիրության համար:
Կրասնոդարի երկրամասի երկրորդ ամենամեծ էթնիկ խումբը հայերն են: Ազգային մշակույթի և լեզվի պահպանման խնդիրները Կուբանի հայ համայնքի հիմնական նպատակներից է:
Ըստ Կրասնոդարի երկրամասի Ռուսաստանի հայերի միության համառուսաստանյան հասարակական կազմակերպության տարածաշրջանային մասնաճյուղի նախագահ Կամո Հայրապետյանի, կրթության խնդիրներն այսօր առաջին պլան են մղվում, քանի որ երիտասարդները բավականաչափ լավ չգիտեն իրենց մայրենի լեզուն կամ չգիտեն ընդհանրապես, և այդ առումով, տարածաշրջանային հայկական կազմակերպությունը մտադիր է օգտագործել տարածաշրջանում առկա բոլոր հնարավորությունները և հայոց լեզվի ուսուցում կազմակերպել այն բնակավայրերում, որտեղ ապրում են համայնքի ներկայացուցիչները:
Կրասնոդարի երկրամասի «Ռուսաստանի հայերի միության» կրթության վարչությունը նախատեսում է օգոստոսի 20-21-ը անցկացնել հայոց լեզվի և հայագիտության ուսուցիչների տարածաշրջանային հանդիպում: Սպասվում է, որ կմասնակցեն ավելի քան հիսուն ուսուցիչներ Կուբանի երկու տասնյակ քաղաքներից և շրջաններից: Նախանշված նպատակներից են հետևյալները.
- հայոց լեզվի, հայ ժողովրդի պատմության, Հայաստանի և հայ եկեղեցու ուսումնասիրության տարածաշրջանային կրթական կենտրոն ստեղծելու նախագիծը
- ուսուցիչների որակավորման բարձրացման դասընթացների կազմակերպումը
- Կրասնոդարի երկրամասի կիրակնօրյա դպրոցների և լրացուցիչ կրթական կենտրոնների համար միասնական կրթական ծրագրի ստեղծումը
- Հայերի մության տարածաշրջանային մասնաճյուղի նախագահի կողմից լավագույն ուսանողներին, թոշակի անցած վաստակավոր ուսուցիչներին, ինչպես նաև սկսնակ ուսուցիչներին խրախուսելը պարգևատրման ձևով:
Նյութը հրապարակման պատրաստեց Կամո Խաչիկյանը
