ԱԺ–ն առաջին ընթերցմամբ ընդունեց Սևանից հավելյալ ջուր վերցնելու նախագիծը

Խորհրդարանը 64 կողմ, 19 դեմ և 1 ձեռնպահ ձայներով առաջին ընթերցմամբ հաստատեց Սևանա լճից հավելյալ ջրառ իրականացնելու վերաբերյալ նախագիծը։

Նիստը վարող ԱԺ փոխնախագահ Ռուբեն Ռուբինյանը հայտարարեց, որ պատգամավորները գրավոր առաջարկներ ներկայացնելու համար 3 ժամ ժամանակ ունեն, որոնց ամփոփումից հետո խորհրդարանը կանցնի նախագծի` երկրորդ ընթերցմամբ քննարկմանը։ Թե կոնկրետ երբ, ԱԺ ղեկավարությունը խոստացավ տեղեկացնել լրացուցիչ։

Մինչ քվեարկությունը նախագիծը բավական լուրջ քննարկման ու ընդդիմության կողմից քննադատությունների արժանացավ։

«Հայաստան» խմբակցության պատգամավոր, բնապահպանության նախկին նախարար Արծվիկ Մինասյանը հիշեցրեց, որ մինչ ոռոգման համակարգում սակավաջրության մասին հայտարարելը ՀՀ վարչապետ Նիկոլ Փաշինյանն այս տարի «աշխարհացունց հայտարարություններ էր անում Սևանի մակարդակի բարձրացման մասին»։

«Պատճառը մեկն է՝ քաղաքական ընտրություններ։ Հանեք, ցուցանիշները նայեք։ Հունիսի 21-ի դրությամբ մենք ունեցել ենք 31 միլիոն խմ-ից ավելի բացթողնում Սևանից, քան նախորդ տարի է եղել։ Սա ի՞նչ է․ հանրային, պետական միջոցների ուղղակի փոշիացում կամ տրամադրում հատուկ նպատակով՝ ընտրական գործընթաց», - ասաց նա։

Կառավարության ներկայացուցիչ, Ջրային կոմիտեի նախագահ Կարեն Սարգսյանը հայտարարեց, որ գետերում ջրի մակարդակի կտրուկ նվազեցման հետևանքով ոռոգման ջրի դեֆիցիտի ծավալը կազմել է ավելի քան 97 մլն խորանարդ մետր: Դեֆիցիտի լրացման համար Մխչյանի և Ռանչպարի պոմպակայանների օգնությամբ ծրագրվում է արտադրել 22,1 մլն խմ ջուր, իսկ մնացած 75 մլն խմ–ը վերցնել Սևանից:

«Ոռոգման սեզոնի սկզբից Սևանից բաց է թողնվել մոտ 154 մլն խմ ջուր, իսկ Արփա-Սևան թունելով լիճ է թափվել 133,8 մլն խմ ջուր: 31,4 հազար հա տարածքի ոռոգումը ջրօգտագործողների կողմից իրականացվում է Մարմարիկի, Ապարանի, Ազատի ջրամբարների, Հրազդան գետի, Սևանա լճի, Մխչյան և Ռանչպար պոմպակայանների աշխատանքի հաշվին»,-նշեց Սարգսյանը:

Նա պարզաբանեց, որ Հայաստանում 12 ջրամբարների առավելագույն լցվածությունն այս տարի կազմել է 526,7 մլն խմ՝ անցած տարվա 140,8 մլն խմ–ի համեմատ:

Հիշեցնենք, ԱԺ–ն այսօր արտահերթ նիստ է գումարել` քննարկելու Սևանից ոռոգման նպատակով հավելյալ ջրառի առաջարկը, որը ներկայացրել է կառավարությունը։

Գործադիր մարմնի նախագծով առաջարկվում է օրենքով սահմանված տարեկան առավելագույն 170 մլն մ³ չափաքանակի փոխարեն այս տարի Սևանից բաց թողնել 245 մլն մ³ ջուր։

Նշենք, որ այս տարի մի շարք գյուղերի բնակիչներ բողոքի ակցիաներ էին անցկացնում` կապված ոռոգման ջրի բացակայության հետ: