Պատվաստումների քանակը քիչ է, դա նշանակում է, որ վարակի դեպքերը կաճեն
ՀԱՍԱՐԱԿՈՒԹՅՈՒՆ
Ամեն օր տեսնում ենք, որ կորոնավիրուսով վարակակիրների թիվն ավելանում է, և արդեն երկու օր է՝ շուրջ 400 դեպք է գրանցվում: Եվ սա միայն թեստավորված դեպքերն են: Այս թեմայով զրուցել ենք վարակաբան Հովակիմ Զաքարյանի հետ։ Հարցին, թե հնարավոր է վարակի այս տեմպը լոքդաունի հիմք դառնա վարակաբանը պատասխանել է․
«Ես չգիտեմ՝ դուք երբ կարող եք ակնկալել լոքդաուն, բայց գիտեմ մի պարզ բան՝ եթե պատվաստումների քանակը քիչ է, վարակի դեպքերը կաճեն: Դա շատ բնական է: Եթե մարդիկ չեն հետևում համաճարակային կանոններին, բնական է՝ կորոնավիրուսի վարակի տեմպը կաճի: Եվ բացի շարքային քաղաքացիներից, պատկան մարմինները նույնպես չեն հետևում, որ մարդիկ պահպանեն կանոնները: Հետևաբար շատ բնական է, որ վարակի դեպքերը օրական լինեն 400, 500, վաղը կլինի 1000, 2000: Վառ օրինակ է Վրաստանի դեպքը, որտեղ օրական մի քանի հազար դեպք է գրանցվում: Հիմք չկա ենթադրելու, որ Հայաստանում այդպես չի կարող լինել, հատկապես եթե հակահամաճարակային կանոնները խստորեն չեն պահպանվում: Ամենապարզ օրինակը տրանսպորտի վիճակն է՝ մարդիկ նորից վերադարձել են նախաքովիդյան ժամանակահատված, երբ «ԳԱԶելի» մեջ 30 հոգով են երթևեկում՝ իրար վրա նստած: Նման իրավիճակում ակնհայտ է, չէ՞, որ քովիդի նոր դեպքեր լինեն: Առավել ևս՝ քովիդ դրական թեստով մարդիկ ազատորեն ելումուտ են անում, և պատկան մարմինները չեն հետևում նրանց տեղաշարժին, չեն պահանջում պահպանել կանոնները, որևէ վերահսկողություն չկա»:
Սոնա Գիշյան
