Ուկրաինայի մայրաքաղաքում լարված իրավիճակ է. ցուցարարները փորձել են ներխուժել նախագահական
ՄԻՋԱԶԳԱՅԻՆ
Ուկրաինայի մայրաքաղաք Կիևում լարված իրավիճակ է։ ՌԻԱ Նովոստին հայտնում է, որ ցուցարարները փորձել են ներխուժել Ուկրաինայի նախագահ Վլադիմիր Զելենսկու գրասենյակ, ընդհարում է տեղի ունեցել ցուցարարների ու ոստիկանների միջև։
Բողոքի ակցիայի կազմակերպիչները`«Ազգային կորպուս» ընդդիմադիր կուսակցության ներկայացուցիչները, պայթուցիկ նյութեր ու քարեր են նետել ոստիկանների վրա, ինչպես նաև գազ բաց թողել նրանց ուղղությամբ։ Նրանք նաև անվադողեր են վառել և նետել իրավապահների ուղղությամբ:
Տեղական լրատվամիջոցները հայտնում են, որ պայթուցիկի կիրառման հետևանքով ոստիկան է վիրավորվել։
Բողոքի ակցիայի մասնակիցներն իրենց հայտարարություններում քննադատում են իշխանությունների, ինչպես նաև նախագահ Զելենսկու գործողությունները, այդ թվում` «Դոնբասում ահաբեկիչների հետ բանակցությունները»` միաժամանակ պահանջելով, որ ուժայինները դադարեցնեն «հայրենասիրական շարժման դեմ պայքարը»։
ՌԻԱ Նովոստիի թղթակիցը որոշ ժամանակ անց հայտնել է, որ Զելենսկու գրասենյակի մոտ իրավիճակը կայունացել է, բայց ցույցը դեռ շարունակվում է։ Կիևի կենտրոնական փողոցներում իրավապահ մարմինների բազմաթիվ աշխատակիցներ են հերթապահում։
