ՈՂԲԵՐԳԱԿԱՆ ԴԵՊՔ Գեղարքունիքի մարզում. սիրած աղջկա մոտ լավ տպավորություն գործելու ցանկությունը...
ՀԱՍԱՐԱԿՈՒԹՅՈՒՆ
Գեղարքունիքի մարզի 73-ամյա բնակչուհու սպանությունը որպես դժբախտ պատահար ներկայացնելու անհաջող փորձն ամբողջությամբ բացահայտվել է:
«Փաստինֆո»-ն ավելի վաղ տեղեկացրել էր, որ դեպքը տեղի է ունեցել փետրվարի 23-ին և ըստ ահազանգի՝ կինը մահացել էր տանիքից վայր ընկնելու հետևանքով, սակայն պարզվել է, որ Շուշանիկ Գյուլումյանը գլխի և պարանոցի շրջանում վնասվածքներ է ստացել և նրա մահվան անմիջական պատճառ է հանդիսացել մեխանիկական շնչահեղձությունը:
Այսպիսով, դեպքի օրը կնոջն այցելել են համագյուղացի երկու երիտասարդ՝ կնոջ խնդրանքով նրանք պետք է վերանորոգեին հեռուստացույցի ալեհավաքի մալուխը։
Երիտասարդները կնոջ հետ բարձրացել են տան տանիքը, սակայն չեն կարողացել վերանորոգել այն, ինչն առաջացրել է տանտիրուհու զայրույթը՝ պատճառ դառնալով վիճաբանության։
Եվ հենց այդ ժամանակ էլ երիտասարդներից մեկը մետաղյա խողովակով հարվածել է կնոջ գլխին և մեջքին, նրանք կարծել են, որ կինը մահացել է ու տանիքից վայր են իջել և կնոջ տանից հափշտակել են ոսկյա զարդեր: Հենց այդ պահին կինը տանիքից իջել է ու օգնություն կանչել և երիտասարդները որոշել են վերջնականապես «լուծել կնոջ հարցերը» և նրան խեղդամահ են արել:
Սակայն մեզ հայտնի է դարձել, որ այս ծանր հանցագործության գնալու պատճառը եղել է այն, որ երիտասարդներից մեկը իր սիրած աղջկա ուշադրությանն արժանանալու և նրա ընտանիքի անդամների մոտ դրական անձնավորության տպավորություն թողնելու համար իր աջակցությունն է առաջարկել, իսկ խոսքը պահելու համար գլխում դաժան միտք է հղացել, որն էլ իրականացրել է:
Երիտասարդներից մեկը, ով անչափահաս է՝ համագյուղացի մի աղջկա է սիրահարվել և որպեսզի կարողանա այդ աղջկա մոտ տպավորություն թողնի և նա ուշադրություն դարձնի իր վրա՝ սկսել է ընկերություն անել այդ աղջկա եղբոր հետ, ով երաժիշտ է և ում հարկավոր է եղել երաժշտական գործիք ձեռք բերել, սակայն դրա համար միջոցներ չի ունեցել:
Անչափահասն էլ, որպեսզի կարողանա տպավորություն գործել սիրած աղջկա վրա ասել է, որ ինքը կվճարի այդ գործիքի համար և որ հետագայում նրանք իր գումարը ետ կվերադարձնեն:
Եվ հենց այս գումարը գտնելու համար անչափահասը դիմել է իր ընկերոջն ու խնդրել է օգնել իրեն հայթայթել պահանջով գումարը, որից հետո էլ նրա գլխում ծագել է այս դաժան միտքը՝ խնդրել է ընկերոջը սպանել Շուշանիկ Գյուլումյանի, սակայն ընկերը սկզբում կտրականապես հրաժարվել, որից հետո անչափահասին հաջողվել է համոզել :
Երիտասարդներին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 7-րդ և 8-րդ կետերով:
Նրանք երկուսն էլ գտնվում են կալանքի տակ:
Աղբյուր` Փաստինֆո
