ԱԺ մեծամասնության և ընդդիմադիր խմբակցությունների միջև չկա իրական համատեղ աշխատանք` ինչը բերելու է առճակատումների և փոխադարձ մեղադրանքների
ՔԱՂԱՔԱԿԱՆՈՒԹՅՈՒՆ
Նոր խորհրդարանն արդեն երեք օր է ինչ սկսել է աշխատանքները, բայց կարծեք թե փոխադարձ վիրավորանքների և մեղադրանքների պակաս չկա:
Այս թեմայով զրուցել ենք Երևանի մամուլի ակումբի ղեկավար Բորիս Նավասարդյանի հետ։
Հարցին, թե ընդհանրապես ինչ պետք է սպասենք այս խորհրդարանից` Բորիս Նավասարդյանը ասել է․ «Կարծում եմ, որ խորհրդարանը որևէ սյուրպրիզ մեզ չի մատուցելու: Ակնհայտ է, որ քաղաքական մեծամասնությունն անելու է իր գործը, այսինքն՝ ընդունելու այն որոշումները, որոնք պետք է ընդունի՝ անկախ նրանից, թե ընդդիմությունն ինչ վերաբերմունք կդրսևորի այդ որոշումների ու նախագծերի վերաբերյալ: Ենթադրում եմ, որ ընդդիմությունը հարցերի մեծ մասի դեպքում համաձայն չի լինելու, քննադատելու է, բայց ոչ մի բան չի կարողանալու փոխել: Բնականաբար, այս մթնոլորտը, երբ մեծամասնության և ընդդիմադիր խմբակցությունների միջև չկա իրական համատեղ աշխատանք, պարբերաբար բերելու է նաև առճակատումների և փոխադարձ մեղադրանքների: Այսինքն՝ պետք է սպասենք այն, ինչ ենթադրվում էր անմիջապես այն բանից հետո, երբ իմացանք ընտրությունների արդյունքները»։
Անդրադառնալով այն հարցին, թե արդյո՞ք օրենսդրական կարգավորումներով հնարավո՞ր է քաղաքական հարաբերությունների մշակույթը կարգավորել և զերծ մնալ հայհոյանքից ու վիրավորանքից` մասնագետը պատասխանել է․ «Օրենսդրությունը ընդամենը գործիքներից մեկն է, և միայն օրենսդրության փոփոխությամբ, բնականաբար, արդյունք չի կարող լինել: Պետք է լինի ընդհանուր քաղաքականություն, որն իր մեջ ներառում է և՛ օրենսդրությունը, և՛ քաղաքական գործունեության էթիկան, և՛ ինքնազսպվածությունը, ինքնավերահսկողությունը քաղաքական գործիչների կողմից, ինչը տարածվելու է անմիջապես ամբողջ հանրության վրա: Այսինքն, եթե լինի այդպիսի քաղաքականություն և այդ քաղաքականության շուրջ քաղաքական վերնախավի համաձայնություն, ապա արդյունք կունենանք: Եթե այդ համաձայնությունը և հստակ մշակված քաղաքականությունը չլինեն, ընդամենը ընդունվեն օրենքներ, որոնք իմիջիայլոց, շատ դեպքերում իրենց հայեցակարգով հակասում են իրենց, ապա միամտություն կլինի հույս ունենալ, որ օրենքները ինչ-որ բան զսպելու են»։
Սոնա Գիշյան
